MTMD Sibu deka chakah nyeliah komuniti teparuk enggau dadah
SIBU: Kaunsil Pengawa Ngemunas Penyalah Dadah ( MTDM) Sibu ransing bejalaika empat Pelin Pengawa Strategik ba tuju nentuka komuniti di Sibu teparuk enggau ulah gian dadah.
Chairman MTMD Sibu Hii Chang Kee madah, pelin ke udah ditetapka sida tu iya nya nyadung penemu baru bekaul enggau penyalah dadah kemaya hari tu ngagai mensia mayuh, chara ke baru begulai enggau mensia mayuh, ngeringka tanggungpengawa ‘Rakan Strategik’, ‘Rakan Pintar’ enggau Gerempung Ukai Dikuasa Perintah (NGO) sereta pengawa ngiru genturung pendiau MTMD.
“Semua empat bengkah pelin tu udah ditumbuh sereta disetujuka semua raban MTMD Sibu maya ke baum sebedau tu.
“Tu ditumbuhka laban pengawa ngemunaska penyalah dadah ukai semina pengawa ke dikereja polis tauka Ejensi Nagang Pengawa Gian Dadah Menua (AADK) aja tang mega bekenaka pemeras kerejasama ari semua ketuai opis, tuai raban bansa enggau mensia mayuh empu,” pia ku iya madah maya pengerami bejadi ‘Simposium Pendayaaupayaan Dadah, Cabaran dan Tindakan Strategik’ ke diatur di Sibu, kilah ensana.
Pengawa nutup simposium nya udah dipenyadi Kaban Kunsil Nengeri ( ADUN) Dudong Datuk Tiong Thai King lalu bela digulu Direktor AADK Nengeri Sarawak Wan Madihi Wan Salleh, Chairman Gerempung Ngemunaska Dadah (PEMADAM) Sibu Awang Yusup Awang Mostapha enggau Sekretari Kaunsil Pemansang Rama Dr Zufar Yadi Brendan.
Bekenangka simposium nya, Hii ti mega Residen Sibu madahka simposium nya mujur diatur bepun ari pemeras raban MTMD Sibu bekunsika penemu ti kreatif kelimpah bela nerima saup ari PEMADAM Sibu, Selangau enggau Kapit.
“Pengawa kitai ke ngatur simposium tu mega seiti ari pakej pemujur ba Pelin Pengawa Strategik MTMD Sibu Keterubah, Kedua enggau iya Ketiga.
“Kitai mega berasai temegah ati laban program tu mujur digulu lebih 300 iku bala tuai raban bansa, Komiti Pengelikun enggau Pemansang Genturung Pendiau, Komuniti 1Malaysia enggau Kawasan Rukun Tetangga.
“Raban ke datai tu beguna amat laban penyalah ngambi dadah ukai semina dikereja seiku dua aja tang mega ari mayuh serak komuniti.
“Nya alai, semua kitai meseti nemu nama penyadi enti kitai ngereja penyalah ti ngaul dadah,” ku iya madah baru.
Berebak enggau nya, Hii sekali agi ngansak bala mayuh bela bejalaika penyawa nyadi komuniti ti betikas tinggi ke ulih nempa pemujur bansa.
“Pelin ke digaga MTMD Sibu bela randaka kerejasama ke manah ari bala mayuh napi penyalah ngambi dadah ti ditemu kitai semua ti ngepunka mayuh macham penyalah rama ke bukai.
“Ngarapka simposium ke diatur serak tu nyadika pelasar kita ke nyadi komuniti ti proaktif sereta enda semina ngarapka perintah aja bejalaika program tauka pengawa ke bekaul tang mega ulih ngatur program ke sama tuju dalam komuniti kita,” pia ku iya madah.