Perintah seruran ngemeratka pekara pelajar
Dikena ngadaka mayuh agi orang gawa profesional ti ulih nyaup ngemansangka nengeri tu
SRI AMAN: Perintah deka terus ngemeratka pekara pelajar di nengeri tu dikena ngadaka mayuh agi orang gawa profesional.
Sapit Menteri Dalam Menua II Datuk Masir Kujat madah, perintah nginginka bala nembiak rebak baru diatu ngulihka mayuh penemu dikena nyapai juluk nya.
“Nengeri tu randaka mayuh orang gawa profesional dikena nyaup perintah ngemansangka nengeri Sarawak,” ku iya.
Masir ke mega Kaban Parlimen (MP) Sri Aman madah munyi nya lebuh ti bejaku rambau bejadika Pengerami Merarau 2017 ke diatur Gerempung Apai Indai enggau Pengajar (PIBG) Sekula Primari (SK) Keranggas ditu, kilah ensana.
Ku Masir madah, bala nembiak kitai patut muai ulah ti kelalah nurun sekula laban berindik ari ulah nya ti ulih ngujungka sida enda tejapaika pemutus peresa ti manah.
Berindik ari nya, apai indai megai tanggungpengawa ti berat nentuka bala anak sida bisi nurun ke sekula ninting hari sereta ngulihka pelajar ti chukup.
“Ba sekula bala pengajar patut ngemataka sida sereta ngajar sida, lalu nangkan ke nya udah bala nembiak pulai ke rumah tanggungpengawa tu ditampung apai indai ke nyadi pengajar sida sereta nentuka sida enda tinggal dalam pelajar.
“Pesan aku ngagai bala nembiak semua, anang sesekali kita masau awak ke udah bisi diatu, tu mih maya kita ngulihka penemu enggau naka ulih laban pelajar tu nyadi ke jematan pengidup kita jemah ila,” ku iya nyemetak.
Sama bisi datai ba pengerami nya Kepala Pengajar SK Keranggas Sigau Kilau, Chairman PIBG SK Keranggas TR Murni sereta bala ke bukai.
Ba pengerami nya Masir udah meri agih belanja sepenyampau RM5,000 ungkup taun 2018 dikena nembuka balai sekula nya, lalu RM5,000 agi ungkup wang turu PIBG.
Nengeri tu randaka mayuh orang gawa profesional dikena nyaup perintah ngemansangka nengeri Sarawak. Datuk Masir Kujat Sapit Menteri Dalam Menua II