Polisi pelajar menua endang seriris enggau pemansang
BINTULU: Ubah ba polisi pelajar menua kenyau ari 50 taun ke udah endang ngemeranka pemereti bala komuniti beratika penemu enggau pelajar nyadi batang pekara kena nangkup peminta enggau tikas runding ti seriris enggau pemansang kemaya hari.
Menteri Bekal Ai enggau Elekterik Menua Pesisir ke lalu nyadi Kaban Kunsil Nengeri (ADUN) Kemena, Dato Sri Dr Stephen Rundi Utom madah, suba apai indai enda kelalu ngemeratka pelajar bala anak sida lalu bala anak besekula ukai deka ngiri penemu aja tang semina nitihka bala bakih.
Tang diatu ku iya, apai indai ukai semina bepanggai ba pelajar bala anak sida ti menyana di sekula, tang nambah jadual belajar bala anak ngagai kelas tuisyen kelebih agi di kandang mengeri.
“Tu bebida endar ba bala anak ti besekula di mengeri enggau menua pesisir,” ku iya lebuhka bejaku di Program Kunsi Hari Besai ( Gawai enggau Hari Raya Aidilfitri) Sekula Primari (SK) St Anthony tu berambaika jaku ` Toleransi Antara Budaya Menggapai Impian Menuju Kecemerlangan’ di balai sekula nya.
Sama bisi datai, bini iya, Datin Sri Loreta Sawot, dua iku Sekretari Politik Kepala Menteri, Jenny Bangga enggau Petrus Igat Mathias sereta Sapit Residen Bagi Menua Bintulu Hamdiah Bakir.
Iya ngansak bala pengajar enggau apai indai di menua pesisir enda meda penyuntuk perengka guna di sekula ba kandang menua pesisir nyadika penanggul bala anak sida nyapai pemujur.
“Apai indai enggau Ger- empung Apai Indai enggau Pengajar (PIBG) nyengkaum bala nembiak di sekula menua pesisir patut seruran diberi peransang ngambika sida terus ransing ngangkatka pemanah tikas penyapai akademik nembiak sereta anang kelalu sebanaka penyuntuk ba perengka guna ke bisi di sekula,” ku iya nerang.
Nya alai ku iya, nyadi tanggungpengawa apai indai dalam PIBG ngambika chakah ngaul diri dalam bemacham program akademik bala anak sida sereta kerejasama enggau bala pengajar endang beguna endar ba sekeda pekara bekaul baka ngintu pengawa di sekula ba pekara pengelikun enggau pengelantang bala anak sida ti besekula.
Ku iya, endang nyenggala apai indai ngarapka pelajar ti menyana ungkup bala anak sida tang pengudah umur manggai 17 taun, apai indai patut berundingka perambu sereta kuing pelajar bala anak sida sekalika nguing ngagai kereja begunaka pengelandik jari baka teknikal tauka akademik.
“Apai indai patut beratika pejalai enggau pengawa ti rindu dikereja bala anak sida sereta anang mejal sida. Bala anak patut diiri enggau pelajar ti engkeman enggau ati sereta pilih ti dikedaka sida ngambi nadai penanggul dudi hari lalu pekara ti patut digaga iya nya meri peransang enggau sukung,” ku iya.
Iya mega ngelalau apai indai sedia meli polisi insurans pelajar kenyau ari anak sida ada ngambika sida muntang nyediaka peminta belanja enggau perambu pelajar dudi hari.
Kelimpah ari nya, iya nangkan bala apai indai eng- gau pengajar nemu ubah pemansang di mengeri ti ngemeratka subjek pelajar ti nangkup peminta kemaya hari lalu sekeda ari nya peminta mayuh agi orang gawa landik dalam teknikal enggau injinir.
Berebak enggau nya, Kepala Pengajar SK St Anthony, Francis Dampa Inggor madahka piak iya beterima kasih ngagai Dr Stephen Rundi udah mayuh mantu sereta ngagihka belanja enggau pengarap deka pulaika pemaik ngagai bala nembiak enggau piak sekula.
Iya mega bisi ngelansa pasal penyapai besai SK St Anthony dalam bidang akademik, lumba enggau ke bukai di renggat bagi menua, nengeri, nasional enggau antarabansa.
Ngelansa pengerami sehari nya, ku iya, tu dikena negutka kaul antara semua ti ngaul bala pengajar, bala staf, nembiak enggau apai indai.
Ku iya, SK St Anthony bisi 59 iku pengajar lalu 1,129 iku nembiak datai ari pupu bansa enggau jalai pengarap, udah manggai 60 taun ti patut endar diintu ngambika rampa sekula manah agi dipeda sereta begunan tadika patut dikemanah.
Berindik ari peminta belanja ulih Kepala Pengajar nya, Dr Stephen Rundi udah ngemendarka geran Projek Mit Pemansang Menua Pesisir (MRP) penyampau RM50,000 ungkup sekula nya lalu RM20,000 da agi dikena ngemanahka tadika sekula nya lalu kesemua penyampau belanja diagih manggai RM70,000 seraya iya ngarapka piak sekula ulih nganjung peminta ba pekara belanja ke bukai terus nuku opis menteri bekaul. BINTULU: Bala apai indai di bagi menua tu dilalau ngaul kerejasama rat enggau pengajar sereta piak sekula ti ngatur pelajar bala anak sida ngambi nentuka bala nembiak sekula nerima akses pelajar ti menyana, pia ku Kaban Kunsil Nengeri (ADUN) Samalaju, Majang Renggi.
Ku iya, ba tuju nya, apai indai enggau pengajar nengah Gerempung Apai Indai enggau Pengajar ( PIBG) di sekula sida empu patut bebendar ngiga sebarang Gerempung Ukai Dikuasa Perintah (NGO), piak korporat sereta orang dagang ti chakah dalam aktiviti bekaul enggau pelajar.
“Nengah gempung entara PIBG enggau NGO deka ngemujurka pejalai tetiap program peransang tauka bekaul pelajar di sekula kelebih agi sekula menua pesisir.
Iya mansutka jaku tu lebuh bejadika Pengawa Nutup Program Peransang Penyulut Sekula Primari (SK) Kem Batu 18 ti diatur begulai sekula nya enggau Serakup Graduet Dayak Sarawak ( SDGA) Bintulu bepalan di laman sekula nya, lemai kemari.
Pia mega ku iya, apai indai patut ngena enggau manah licha peransang ti dikenatai dikena nentuka sida ulih nerima penerang ti beguna bekaul enggau chara ke ulih diambi kena mantu bala pengajar enggau nembiak ngangkatka tikas akademik bala anak sida ti deka napi peresa.
“Nya alai aku ngarapka apai indai nyediaka bilik khas ungkup bala anak sida belajar maya di rumah nentuka sida ulih meri perati ba pelajar,” ku iya.
Dalam jaku dipansutka iya, Majang mega muji SDGA Bintulu laban chakah bejalaika mayuh macham program peransang ke bansa nya kelebih agi di sekula menua pesisir ti tebal agi nembiak iya datai ari bansa Dayak.
Iya nyukung enda pengawa ke bansa nya ngarapka SDGA Bintulu deka neruska program peransang bansa nya dudi hari enggau ngemesaika agi singkang ngagai sekula di menua ulu.
“Semua tu dikena nentuka komuniti menua pesisir kelebih agi apai indai nemu tips pemadu manah mantu bala anak sida ngulihka pemutus ti nyulut dalam peresa,” ku iya nambah.
Ba lansa bekaul, iya mega ngemendarka bantu sepenyampau RM7,000 ngagai SDGA Bintulu dikena ngemujurka program bekaul akademik di sitak Bintulu.
Iya mega ngarapka SDGA Bintulu ngena memanah belanja ti diberi nentuka mayuh agi pengawa ngatur program peransang di sekula-sekula di bagi menua nya jemah.
Chairman Komiti Pengantara SDGA Bintulu, Thwaites Langak enggau Kepala Pengajar SK Kem Batu 18, Paul Jarum sekeda bala ke bisi datai.