Penguang ngelalau peranak Marudi anang mudah arapka jaku petenah

MARUDI: Peranak Marudi ditu ditangkan anang mendingka jaku sekeda piak ti udu nabur petenah bejai perintah enggau Kaban Kunsil Nengeri (ADUN) sitak nya.

“Badu agi ngachau peranak Marudi, timpuh nuan udah abis, leka naka nya aja.

“Aku nyadi pengari rayat sereta ni naka ulih aku gawaka rayat lalu nya kebuah perintah ngatur Pengawa Bepilih Besai (PRU) dikena milih sapa bagi pengari pemadu manah ngarika sida dalam perintah Barisan Nasional (BN).

Ku iya, dalam kandang setaun nyadi pengari BN ke alai semaya digaga udah dikeamat baka Waterfront udah dikemendar enggau belanja ngaga sepenyampau RM23 juta lalu Jalai MiriMarudi taja gaya jalai apin manah tang piak Kunteriktor CMS Sdn Bhd udah naka ulih ngemanahka iya.

“Taja sida bedai nerima surat menggi kunterik nya tang sida ngena belanja diri empu. Nya kebuah aku suah endar nawar ngagai kompeni tu.

Pekara tu dipansutka Menteri Muda Kaun- sil Kandang Menua, Datu Dr.Penguang Manggil lebuhka bejaku ba Pengerami Muka Citrawarna Penyerakup Komiti Rukun Tetangga (KRT) Marudi di Balai Komuniti Kampung Narum ditu, kemari.

Pengerami Citrawarna Penyerakup diatur begulai KRT Kampung Narum, Kampung Dagang, Kampung Pemindahan Baru enggau Rumah Jimbau di Marudi.

Ku Penguang nambah, iya endang suntuk ba pekara belanja tang ulih gawaka rayat. Tuju sida ti ngajum runding rayat lalu berani ngempung sekeda ex-ketuai komuniti ngambi begedika iya.

Nya alai, kitai suah bejakuka pekara penyerakup laban serakup rayat enggau bansa nyadika pengelikun enggau pengelantang semua. Rayat ulih diau likun, bekerejasama enggau bebaik sereta meretika pangan diri.

“Pekara tu ukai muntang dikereja, saru penemu tau ngujungka rayat pambar ari penyerakup komuniti enggau bansa, ti tau ngasuh pemansang infrastruktur te- janggal. Ari sukut ekonomi, enda mansang tang orang nadai kereja, penanggul rama, orang ti ngereja penyalah enggau ke bukai deka majak nambah lalu tu tau ngasuh komuniti Borneo pambar.

Berebak enggau pengerami nya, Datu Dr.Penguang udah ngemendarka geran Projek Mit Pemansang Menua Pesisir bela penyampau RM5,000 ngagai KRT Kampung Dagang KRT, KRT Kampung Pemindahan enggau KRT Rumah Jimbau KRT seraya RM10,000 diungkup ngagai KRT Kampung Narum lalu dulu agi ari nya Penguang mega bisi nyuaka pemeri Duit Raya ngagai bala nembiak mit umur biak ari 12 taun.

Sama bisi datai Penulung Pemesai Opis Penyerakup Menua Enggau Intergrasyen Nasional (JPNIN) Bagi Menua Miri Hasri Ali, Chairman KRT Kampung Narum Hussain Jamhali, SAO Reagan Edwin, Chairman Kaunsil Pelilih Marudi (MDC) Kaunsilor Edward Mendai enggau Pemesai Pemadah Marudi Joseph James.