PRU14: Genap parti BN patut meri awak ngagai chalun indu
KUCHING: Sekretari Sayap Indu Parti Pesaka Bumiputera Bersatu (PBB) ti mega nyadi Menteri di Opis Menteri Besai, Dato Sri Nancy Shukri meransang parti komponen Barisan Nasional (BN) bukai ngeletakka chalun indu sida bediri maya Pengawa Bepilih Besai (Parlimen) PRU ke-14 tu ila, kelebih agi di kandang menua pesisir.
Ku iya madah, ungkup PBB pemayuh orang indu ke udah nyadi pengari rayat (parlimen) udah chukup.
“Dalam PBB, aku enda entu nemu, tang pemayuh kami indu ke nyadi pengari rayat ( parlimen) udah chukup. Kami bisi 14 buah kerusi tang aku meransang ngarika orang indu parti komponen BN bukai, ngambika ketuai pemesai parti sida bisi ati deka ngasuh chalun indu bediri maya PRU tu ila.
“Udah datai timpuh parti komponen BN ngirai chalun indu sida bediri kelebih agi ba kandang menua pesisir laban nyema mayuh penuduk parlimen di kandang menua pesisir majoriti nya indu, nya alai, tu tau dikena ngangkatka sukung orang indu,” ku Nancy.
Nancy ti mega nyadi Kaban Parlimen (MP) Batang Sadong madah munyi nya lebuh dikerandau pengudah ngepunka Ramah Tamah Aidil Fitri di luar Masjid AlIhsan di genturung pendiau Kpg Haji Baki semak ditu, kilah ensana.
Ku iya nambah, pasal chalun indu diasuh bediri sigi udah suah dipejuraika tang pemerat bansa tu enda ulih dipajak laban bepanggai ba konstitusyen parti, tang enti ba renggat entarabansa ku iya, urung 30 peratus enda tau enda chalun indu laban sekeda menua bisi penuduk ke endang ungkup ke orang indu.
“Enti di menua bukai ke endang bisi ngungkupka penuduk orang indu, kekadang, ke betangkup nya sama chalun indu, lalu sapa pan ke menang, penuduk nya agi ungkup orang indu.
“Tang ba Malaysia enda bansa nya, laban semua tu bepanggai ba konstitusyen parti, tambah mega dalam politik, mayuh agi lelaki,” ku iya.
Nya alai, ku iya, ngarapka ketuai pemesai lelaki mendingka peminta orang indu, meransang orang indu ari parti komponen bediri maya PRU tauka PRN.
“Ngarapka ketuai pemesai lelaki mendingka sada orang indu…Enda ngawa mayuh penuduk ke orang indu laban pemayuh orang indu nyauka sebaka enggau pemayuh orang lelaki,” ku iya.
Ba PRU13 sebedau tu, BN enggau komponen parti BN mujur teulihka 25 penuduk ari 31 penuduk.