Penyerakup ke dikemeran diatu patut diturunka ngagai rebak dudi
SRI AMAN: Ulah ‘Ngemeranka Penyerakup, Beka Ngintu Mayuh Pengerami’ nyadi seiti konsep pemereti ati ti patut diterenak ba genap iku peranak Malaysia seriris enggau Konsep Gagasan 1Malaysia ti dipunka Menteri Besai (PM) Malaysia, Dato’ Sri Mohd Najib Tun Abd Razak, ba pengawa ngintu pengelantang pupu bansa di Malaysia.
Menteri Muda Pengelantang Komuniti Sarawak, Datuk Francis Harden Hollis, madahka tu pangku pengawa besai endar ti dipangku Opis Penyerakup Menua enggau Integrasyen Nasional ( JPNIN) enggau Rukun Tetangga nentuka pengelantang enggau pengelikun menua tu seruran bisi ungkup rebak dudi hari.
“Pangku pengawa komuniti besai endar lalu enda ulih ditiap ngena wang ringgit. Buai ulah ngeninggi diri lalu beratka pekara ngaul komuniti ngambika juluk kitai beserakup ulih dijapai.
“Perintah kemaya hari benung ngelangkar Transformasyen Nasional (TN50) nengah input ti diulih ari serata menua ari bemacham sukut penerang. Chara “bottom-up” iya nya ari akar umbi lalu ukai nya ari atas ke baruh, iya nya, berundingka penemu rayat dulu agi lalu iya dipunka enggau nembiak rebak baru,” ku iya.
Iya ke mega Kaban Kunsil Nengeri (ADUN) Simanggang mansutka jaku tu lebuhka bejaku bejadika Pengerami Pemanah Tanggam Kaul Gawai Raya KRT Bagi Menua Sri Aman diatur JPNIN Sri Aman enggau kerejasama Komiti KRT Sri Aman bepalan di Balai Suarah, semak ditu, malam kemari.
Nya alai ku iya, kaul rebak baru nengah Jiran Muda ari baruh KRT nyadi seiti pelasar ti ulih ngansah penau nyadi ketuai enggau kereja volunteer.
“Aku ngarapka 53 bengkah KRT di Bagi Menua Sri Aman kelebih agi 24 bengkah KRT di sitak dipegai aku ulih numbuhka Jiran Muda.
“kebuah pia, semina lapan aja Jiran Muda ari 24 KRT ti chakah ngatur program begulai enggau KRT. Kaul raban nembiak beguna endar laban sida tu deka nampung pengawa nyadi ketuai KRT dudi hari,” ku iya nerang.
“Besai endar pengandal aku ngambika pengawa manah tu chakah agi dipejalai nentuka pengawa perintah deka nempa sebuah menua bansa Malaysia ti ulih bediri ba tikas dunya enggau identiti kediri empu.
“Ba Komiti KRT, pangku pengawa kitai endang enda ulih disakal agi, bediri teguh, tetapka penetap diri, sereta gawa nentuka pengelantang enggau penyerakup komuniti seruran dikemerat,” ku iya nambah.
Sama bisi datai, Direktor JPNIN Sarawak, Dirwana Azool, Pemesai Penyerakup Sri Aman, Fikri Emir Zulke- fli, Pemancha Mas Shamsiah Maslem sereta bala kaban KRT ke bukai.
Berebak enggau pengerami nya, Harden bisi ngemen- darka agih belanja penyampau RM20,000 ungkup taun 2018 ngagai Komit KRT Sri Aman dikena sida bejalaika aktiviti ninting taun sida.