Rikod pemujur ke dijapai anak ba sekula patut sebela
SRI AMAN: Rikod pemujur ke dijapai bala anak ba sekula patut sebela sekalika ba sukut akademik, kokurikulum enggau lumba deka nempa modal mensia ti menyana di menua tu, pia ku Kaban Kunsil Nengeri ( ADUN) Bukit Begunan, Datuk Mong Dagang.
Nya alai, runding apai indai ku iya patut berubah nyema dekaka bala anak sida disengkaum nyadi raban modal mensia menyana di menua tu nengah penyapai sebela ba ketetiga sukut nya.
“Perintah dekaka apai indai beratka ketetiga bidang tu sebela ngagai bala anak nentuka pengawa nempa modal mensia menyana di menua tu nyadi nyata.
“Nya kebuah aku enggai meda apai indai semina meransang bala anak sida ngemeratka seiti ari tiga iti bidang tu,” ku iya.
Iya mansutka jaku tu lebuhka bejaku bejadika Program Jogathon, Sekula Primari (SK) Melugu diatur Serakup Apai Indai enggau Pengajar (PIBG) sekula nya, semak ditu, pagi kemari.
Kelimpah ari nya ku iya, perintah mega nyuluk tiga batang pekara iya nya raban bansa, jalai pengarap enggau main asal ulih dijapai nengah sekeda aktiviti lumba dikena nyapai tikas pemansang menua.
Ketetiga pekara tu ku Mong beguna endar diterenak dalam diri atlit lumba laban dudi hari sida tu deka nyadi modal mensia menyana deka nampung pemansang menua dudi hari.
“Nya alai, beguna amat semua piak nyengkaum apai indai pengajar ngemujurka aktiviti lumba ti ngaul pekara raban bansa, jalai pengarap enggau main asal di sekula sida empu.
“Kesemua tu meseti dipun ari renggat akar umbi bala nembiak nentuka juluk pemansang menua dijapao datai ba taun 2020 ila,” ku iya.
Sama bisi datai Kepala Pengajar, Louis Aom, Sapit Residen Pemansang Bagi Menua Sri Aman, Philip Peter Salam, bala pengajar kanan sereta apai indai nembiak ke bukai.
Berebak enggau nya, Mong udah nyuaka geran penyampau RM15,000 ngagai piak sekula dikena ngatur Pekit Gendang Pampat dalam taun 2018.
Bisi 153 iku pesereta udah ngambi bagi dalam Jogerthon taun tu.