Pengawa ngintu Hari S’wak di Sibu richah sereta likun
SIBU: Terais nyawa nyebut Sarawak Merdeka nyaris didinga lebuh sekeda gerempung ukai dikuasa perintah (NGO) bejalai bebala mayuh meling pasar Sibu kelai bela ngintu Hari Sarawak 2017 ditu, kemari.
Pengawa tu dikemujurka Sarawak Association People’s Aspiration, Terabai Menua, Gerempung Anak Dayak Sarawak (PERANAK), Dayak National Congress enggau Sarawak Independence Alliance.
Kelimpah ari nya, bepuluh buah mutosikal raban nembiak ke datai ari Sarikei bela bisi datai ngulu pengawa nya.
Dikena ngemunka pengawa, lebih 200 iku bala ari gerempung nya ti bisi datai dulu agi ngemataka adat lama miring.
Nangkan ke nya, sida meri basa ngagai lagu menua Sarawak lama seraya ngitang menira Sarawak suba.
Sekeda bala ketuai gerempung bela diberi awak bejaku ba mua bala mayuh maya nya.
Ari jaku ke dibantai, semua gerempung ti bisi ngemujurka pengawa nya besemaya deka begempung enggau pangan diri bejalaika pengawa ti bekaul ngelawa tuju penumbuh gerempung ke sebaka.
Sida mega besepenemu ngarapka pengari rayat menua Sarawak berani mantaika peminta tauka ngeringka hak rayat menua tu.
Sepenembu nya, sida bebala mayuh seretai bejalai bebaika banner meling pasar Sibu.
Pengawa ke diatur nya kemari mujur sereta likun kelimpah dikemata raban polis.
Ba taun nyin kemari, niang ex- Kepala Menteri Tan Sri Adenan Satem udah ngenukuka 22 Julai nyadi hari besai Sarawak beserimbai enggau hari merdeka Sarawak ari pegai perintah British.
Taun tu, taun kedua menua Sarawak ngintu hari besai nya.