Mensia mayuh diperansang nyaup nambahka keresa lama ba muzium Miri
MIRI: Raban orang ngumpul keresa lama ditu endang diperansang meri ngagai Muzium Main Asal enggau Pesaka Miri, ti ngena begunan lama Opis Residen Miri.
Menteri Muda Dagang Temuai, Seni enggau Main Asal, Datuk Lee Kim Shin, madahka barang ti diberi tu ila ulih nyaup muzium nya ngumpul bemacham keresa lama enggau barang ke bukai bekaul enggau main asal ari pupu bansa di bagi menua tu.
Ku iya, bisi komiti khas bela ditumbuh sereta ngaul raban komuniti ti ngarika pupu bansa di Miri.
“Kitai minta sida ukai semina meri penemu, tang bela meri keresa lama ngagai muzium tu ila, kelebih agi bekaul enggau main asal, ke alai keresa lama tu mar diulih,” ku iya.
“Kitai mega ngelaluka peranak Miri ti bisi ati bela meri keresa lama bekaul enggau seni, main asal enggau keresa lama Miri, anang sanggu datai meri bantu,” ku Lee nandu.
Nitih ku iya, muzium nya kedua di mengeri tu pengudah Muzium Petroleum, di Bukit Kanada, deka nyadi seiti da agi produk enggau pematak temuai di Miri, pengudah nya tembu ila.
Sepenyampau RM450,000 udah dikemendar ungkup projek ngemanah enggau ngubah begunan tu kelebih agi ba langkar dalam, nentuka bemacham keresa lama ulih dipandang enggau manah.
“Aku ngarapka kereja ngubah renggat tumu muzium tu ila ulih tembu ujung taun tu ngambika sebagi ari muzium nya ulih dibuka ngagai men- sia mayuh ba pun taun nyin ila,” ku iya seraya nambah, muzium tu deka digaga enggau diubah berenggat.
Dulu agi ari nya, Lee udah bejadika Pengawa Mandangka Keresa Lama enggau Main Asal di Pustaka Miri ditu, kilah ensana.
Ngelansa pasal pengawa ke diatur nya, Lee muji pengawa dipejalai begulai ulih Gempung Serakup Komuniti Guangdong Sarawak, pampang Miri enggau kerejasama Pustaka Miri, ukai semina mandangka tipan jerita ari komuniti nya ke bisi ditu, tang mega nyadi sebagi ari serak cherita bansa enggau sejarah ti bebida asal penatai di dunya tu.
Ku iya, mensia mayuh ti datai meda pengawa tu, ukai semina meda keresa lama ti dikumpul ari jeman aki ini sereta manggai beratus taun, tang sida mega ulih belajarka sejarah enggau penatai asal keresa lama nya.
Berindik ari nya, iya merambu ngagai sida ke bisi keresa lama tauka keresa ti berega enda masau iya pia aja, tang taruh memanah, laban bisi maya dudi hari mar rega lalu tau nyadi keresa lama.
Bemacham keresa lama bisi dipandang di lobi Pus- taka Miri baka jam lama, chapak, banda lama, perengka seramik, barang besi, jemari, mija enggau bangku sereta peti menanyi.
Kelimpah ari dipandang, keresa lama tu mega dijual, berengkah ari rega beribu manggai RM86,000 iya nya set mija kayu ti dipechaya semina bisi tiga buah aja ke bansa nya di dunya, dibai khas ari tanah besai China, beratus taun ke udah.