Penembu Jematan Batang Lupar nyungkak ekonomi
Projek tu deka ngelantangka peranak ba nebing pantai S’wak baka di sitak Lingga nyentuk ke Sebuyau
SRI AMAN: Projek ngaga Jematan Batang Lupar deka ngubah gaya rampa menua sereta ngemansangka sosio ekonomi peranak di kandang menua ba nebing pantai Sarawak kelebih agi di sitak Lingga nyentukka Sebuyau.
Kaban Kunsil Nengeri (ADUN) Lingga Simoi Peri madah, projek ke beungkus dalam RM1 biliun tu deka nyambung Kampung Triso nyentukka Sebuyau semanjai satu kilometer ke deka berengkah taun nyin ila.
“Penembu jematan tu ila deka ngubah gaya rampa menua sereta nyungkak pemansang ke ngaul kandang menua nebing pantai di Sarawak kelebih agi ba sitak Lingga nyentuk Sebuyau.
“Projek ngaga jematan tu iya nya kerejasama begulai perintah besai enggau perintah nengeri ti deka ngambi timpuh lima ngagai enam taun pengelama,” ku iya ma- dah rambau ‘Majlis Ramah Tamah Aidilfitri’ renggat sitak Kunsil Nengeri (DUN) Lingga ti bepalan ba Dewan Suarah ditu kilah ensana.
Ku Simoi nambah, pengawa ngaga jematan tu iya nya berindik ari guna rayat kelebih agi di sitak Maludam, Beladin, Triso sereta sekeda kandang menua ti jauh deka ngelawa mengeri Kuching.
“Timpuh pejalai ngagai Kuching nyema nengah jematan tu dampih agi enti dibandingka enggau ngelama tu sida ti diau ba kandang menua nya enggai enda mansa Betong, Sri Aman, Serian udah nya baru datai di Kuching, lalu tu pejalai ti jauh sereta panjai,” ku iya madah.
Ku iya iya nandu, buah runding ngaga projek jematan tu iya nya asil ari randau enggau Menteri Besai Malaysia Datuk Seri Najib Razak enggau ex-Kepala Menteri Sarawak niang Tan Sri Ade-
Simoi Peri ADUN Lingga
nan Satem maya bejadika Jematan Batang Sadong taun nyin kemari.
“Maya nya Menteri Besai enggau ex-Kepala Menteri niang Tok Nan bela udah besetuju ngemendarka agih belanja ti dibagi bela entara perintah besai enggau perintah nengeri dikena neruska perambu ngaga jematan nya,” ku iya.
Berindik ari nya, pengawa ngaga jematan nya mega deka nerima empas ti positif ke deka nyungkak pemansang di kandang menua ti besemak.
“Jematan tu mega dipadahka entara jematan ti pemadu panjai di Sarawak,” ku iya.
Sama bisi ba pengerami nya Pemesai Pelilih Sri Aman Ismawie Salleh, Pegawai Tadbir ba Opis Pelilih Sri Aman Hamizah Yahya, Pemancha Mas Shamsiah Maslem, Penghulu Abang Mohd Salleh Abg Kawi, Penghulu Jemari Edi, Penghulu Joseph Lichong sereta ke bukai.
Urung 1,000 iku mensia mayuh datai ngulu pengerami nya.