Pakan beguna jalai ke meruan agi
SARIKEI: Pakan begunaka jalai ke meruan agi nyambung ngagai mengeri bukai sereta palan pengerembai ekonomi baka ti udah dipunka perintah ba kandang ngelingi menua nya.
Kaban Kunsil Nengeri (ADUN) Pakan, Tan Sri William Mawan Ikom madahka pelin baru ke besai sereta menyana agi patut bisi dikena nangkup penyampau entukar ti majak nambah betengahka jalai sereta dikena ngenyukupka pemanah infrastruktur nuju palan pengerembai ekonomi baka Sadok Agropolitan di Betong, Hub Halal enggau SCORE di Tanjung Manis
Pakan deka nyadi palan ti strategik nyadi palan pengerembai ekonomi ti semina begunaka pejalai dilawa pengelama sejam tauka dua jam, ku iya.
“Sadok Agropolitan di Betong, ambika chunto semina sejam pejalai lalu pia mega Tanjung Manis enggau Padang Bilun Sibu,” ku iya lebuh nyuaka geran Projek Mit Pemansang Menua Pesisir ( MRP) ngagai mayuh bengkah gerempung di Rumah Temuai VVIP Sri Nyelong, ditu, bedau lama udah.
Mawan ngagihka geran MRP sepenyampau RM270,000 ngagai 19 buah gerempung ari sitak Pakan ba pengawa sehari nya.
Mawan ke mega Kaban Parlimen ( MP) Saratok madah iya deka meri pemerat ngagai projek jalai baru laban iya pechaya tu deka nyadi peransang ti besai ngagai pengerembai sosio ekonomi di Pelilih Pakan.
Iya deka beambi ulih ari pangku pengawa nyadi MP Saratok berunding enggau opis bekuasa perintah besai sentang baka ni chara ngemujurka perambu, ku Mawan, seraya nambah, tentu mega nyadi ADUN ba sitak nya ( Pakan), iya mega deka berandau enggau opis bekuasa nengeri sentang baka ni deka ngenamaka nya ngagai perambu pelin besai ba projek besai ekonomi ti deka dipejalaika perintah nengeri.
Iya gaga ati meda Pemesai Pelilih Pakan, Seroji Ludin mega bisi pengeran nampung perambu baru projek Jalai Pakan, ku Mawan, seraya nambah, seduai udah dipadah ke alai iya deka mantaika perambu nya maya aum Komiti Pemansang Pelilih udah tu.
Iya ngasaika udah udah datai ba maya ke patut Pakan bisi jalai ti menyana agi dikena nembuka projek Jalai Besai Pan Borneo ti dipelaba deka tembu kandang beberapa taun agi, ku Mawan nampung.
Kelimpah ari penyikap perengka guna pengerembai ekonomi, jalai ti menyana deka nyamin penguna jalai alun likun sereta lantang agi betengahka jalai, ku iya.