Anang ngaul diri enggau pengawa makai suap KM ngemeratka pekara tu ngambika projek pemansang dipejalai enggau lurus, manah
KUCHING: Kepala Menteri (KM) Datuk Amar Abang Johari Tun Openg seruran ngemeratka chara tetiap ketuai bejalaika pengawa ti enggau pengelurus sereta ransing, iya nya enda ngau diri enggau pengawa makai suap sereta efektif ti nentuka pemujur pejalai projek pemansang ti dilangkar.
Ba aum media, pengudah bejadika aum sehari ‘Governance Culture – What’s Possible?’ ti digaga di sebuah hotel ditu bedau lama, pengari KM iya nya Menteri di Opis Kepala Menteri Datuk Talib Zulpilip madahka KM seruran ngelalau ngambika semua staf perintah enda ngaul diri ari pengawa makai suap. Pekara tu mega ulih nentuka perintah nengeri Sarawak diintu enggau manah sereta komited dalam bejalaika tanggungpengawa sida.
“Tu pengawa ke seruran dilalau sereta diperatika Kepala Menteri Datuk Amar Abang Johari Tun Openg, ke deka meda perintah nengeri tu bejalaika pengawa enggau lurus enggau komited ngambika semua projek ke dilangkar di nengeri tu mujur,” ku Talib.
Kelimpah ari nya, Talib madahka perintah nengeri Sarawak endang ngemeratka pekara bekaul integriti nya kebuah semua pemesai opis perintah, menteri kabinet sereta mega Kaban Kunsil Nengeri ( ADUN) dipinta macha sempekat integriti ngambi ulih ngemunaska pengawa makai suap.
“Pengawa nentuka integriti tetiap staf perintah diteruska Abang Jo lebuh iya dipadu mangku pen- gawa nyadi Kepala Menteri. Kelimpah ari nya kaban kabinet mega dipinta nyain sempekat nyeliah pengawa makai suap. Tu tanda ke manah dikena ngenegapka integriti ke bepun ari orang ti ba penuduk pemadu tinggi,” ku iya.
Ku iya nandu, pengawa Ejensi Nagang Pengawa Makai Suap (MACC) ti ngiga staf opis perintah di bisi ditemu makai suap endang seruran nerima sukung ari perintah nengeri.
“MACC udah ngaga pengawa sida enggau pengabis manah, lalu pengawa bansa tu patut diterima enggau manah laban MACC megai pengawa khas bekaul pekara tu,” ku Talib lalu nandu baru madahka pengawa makai suap di Sarawak agi ba tikas ke baruh enti dibanding ba renggat nasional.
Tu pengawa ke seruran dilalau, diperatika Kepala Menteri Datuk Amar Abang Johari Tun Openg, ke deka meda perintah nengeri tu bejalaika pengawa enggau lurus, komited sereta semua projek ke dilangkar di nengeri tu mujur. Datuk Talib Zulpilip Menteri di Opis Kepala Menteri