Tanggungpengawa JPPK Sarawak mantu orang dagang di nengeri tu
KUCHING: Komiti Ngatur Pengawa Pemansang enggau Pekara Dagang (JPPK) Nengeri Sarawak ditumbuhka dikena ngatur sereta nyerenih bantu enggau program ke dipejalaika ungkup orang dagang kelebih agi orang dagang mit enggau tengan pemesai ( PKS) di nengeri tu.
Sapit Kepala Menteri, Datuk Amar Awang Tengah Ali Hasan madahka, tuju komiti nya ditumbuhka dikena nempa kerejasama entara ejensi pengawa dagang dikena mantu enggau naka ulih ngiga barang mata ke bisi ungkup orang dagang nengeri tu.
“Komiti tu deka ngelangkar chara kereja ngambika bisi atur sereta sistematik awakka enda beserak projek tauka program sereta dikena ngenukuka tetiap inisiatif pengawa dagang ke dipejalaika ulih datai ba raban ke dituju.
“Penumbuh komiti tu ukai enggau juluk deka ngambi kuasa sereta tanggungpengawa ejensi bukai ti bekaul enggau pengawa dagang di Sarawak.
“Tang komiti tu lebih ngagai ngemansangka kerejasama dua piak ke lebih manah, ngulihka timbal positif ti mai penguntung sereta bekunsi mayuh macham pekara baka pengelandik, belanja enggau pengereja pengawa,” ku iya dalam aum pengarang berita.
Dulu ari nya Awang Ten- gah ti mega nyadi Menteri Industri enggau Pemansang Pengawa Dagang udah medingka licha bekaul enggau komiti sereta bekaul enggau industri nya.
Nitihku iya semua aktiviti enggau program 62 bengkah ejensi nengeri enggau perintah besai deka dibagi ngagai kategori sereta dibagi ngagai lima Komiti Teknikal iya nya Komiti Pemansang Kapasiti; Bantu Agih Belanja enggau Perengka; Palan Dagang; Makit enggau Pemansik, Inovasyen & Kreativiti.
Iya madahka sebengkah portal mega deka ditumbuh sereta dipenyadika ila ke alai semua aktiviti enggau program deka dipasukka dalam portal nya ngambika ditemu semua orang kelebih agi PKS.
“Asil ari penumbuh tu ila, kitai deka numbuhka portal ungkup semua aktiviti enggau program ke udah diatursama ari semua ejensi ti bekaul dalam SEDC deka dipandang ba semua Opis Residen enggau Opis Pelilih Menua.
“Nengah portal tu ula pe- mansang orang dagang deka ngelui tauka ngerembai agi , sereta semua aktiviti enggau program deka diatursama nitihka haribulan, endur sereta raban ke deka diberi program.
“Portal tu deka ditumbuhka pemadu laun taun baru nyin ila,” ku iya.
Sama bisi dalam aum pengarang berita nya kemari, Menteri Muda Pemansang Pengawa Dagang Mit enggau Tengan Pemesai (PKS) enggau Orang Dagang Datuk Mohd Naroden Majais enggau kebukai.