Perintah nengeri nyukung kompeni asal nengeri
Tajapia kualiti produk ke dipansutka sida dikemerat ngambika sida ngeluar kualiti ba ikas ke tinggi
KUCHING: Perintah nengeri deka nyukung kompeni asal nengeri tu ti mansutka produk sida empu, ku Sapit Kepala Menteri Tan Sri James Masing.
Iya ke mega Menteri Pemansang PerengkaGuna enggau Pengangkut madah atur nya dikena nentu kompeni ngambi bagi ba pekara pemansang nengeri sereta teulihka pemaik.
“Kitai deka nguna produk ari kompeni asal nengeri tu ba pengawa pemansang ti dipejalai, awakka kompeni nya ngerembai ba pengawa dagang.
“Tajapia, kitai beratka pekara kualiti ba produk ke dipansutka sida. Kualiti produk meseti ba ikas ke tinggi,”ku iya.
Iya mansutka jaku nya ba aum pengarang berita ba penemuai kereja ngelawa Gudang Weida Integrated Industries Sdn Bhd di Sejingkat ditu,
Kitai deka nguna produk ari kompeni asal nengeri tu ba pengawa pemansang ti dipejalai, awakka kompeni nya ngerembai ba pengawa dagang. Tan Sri James Masing Sapit Kepala Menteri
kemari.
Ba penemuai nya, Masing muji produk ke digaga WEIDA ke ditumbuh kenyau 30 taun ke udah ke alai tebal agi produk kompeni nya udah dikena ba pengawa pemansang di Sarawak.
WEIDA ku iya, mansutka produk ‘ High Density Polyethylene’(HDPE) baka tangki ai, kelbat sereta ke bukai ti mudah dibai mindah kin kitu.
Kelimpah ari nya ku iya, produk WEIDA enda mar rega sereta mudah mega dipasang ba palan projek.
“Produk ari WEIDA udah dikena ba projek JKR jalai menua pesisir baka ke Jalai Paya Biru di Simunjan enggau sekeda projek bukai,”ku Masing nambah.
Bela datai ADUN Tamin Ir. Christopher Gira, Sekretari Politik (Kepala Menteri) Dato Sri Doris Brodie, Chairman Eksekutif WEIDA Dato Lee C.C, Direktor JKR Ir. Zuraimi Sabki enggau orang bukai.