Fatimah: Bejejimat maya musim kemarau diatu
Kes angus majak nyadi diatu ke alai penyampau nya udah nambah enti dibanding enggau taun ke udah
KUCHING: Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Datuk Fatimah Abdullah ngelalau mensia mayuh jejimat maya musim kemarau diatu.
Ku iya, kes angus udah majak nyadi ba maya ke diatu ke alai penyampau nya udah nambah enti dibanding enggau taun ke udah.
“Maya musin kemarau, aku meda pun kayu enggau rumput rangkai, tu tau ngasuh api nyadi enggau mudah.
“Ungkup sida ke nginsap, anang muai papung insap sengapa ngambi ulih nyeliahka penusah angus nyadi. Pia mega ngagai sida ke berapi ba dapur, padamka api pengudah tembu berapi,’ku iya.
Fatimah mansutka jaku nya pengudah ngemujur pengawa nyuaka bantu belanja ngagai orang ke tasah ba penusah
Ungkup sida ke nginsap, anang muai papung insap sengapa ngambi ulih nyeliahka penusah angus nyadi. Pia mega ngagai sida ke berapi ba dapur, padamka api pengudah tembu berapi. Datuk Fatimah Abdullah Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak
angus ke bisi nyadi ngelingi Mengeri Kuching.
Pengawa nya diatur di Begunan Baitulmakmur ke alai bisi 14 iku ketuai ruang bilik sida ke tasah ba penusah angus nerima bantu ari Fatimah nengah Opis Pengintu Pengelantang Pendiau (JKM) kemari.
Kelimpah ari nya, iya mega ngelalau mensia mayuh nguna perengka lekterik enggau wayar ke bisi kualiti.
“Jaku tangkan ari Opis Bomba dekaka kitai nguna perengka lekterik ke bisi kualiti sereta ngembuan chop SIRIM,’ku iya.
Bengkah bantu ke disua Fatimah nyengkaum bantu ari pekara belanja, pemakai, perengka besekula, pekayan sekula, pekayan ninting hari, perengka dapur, perengka bilik tinduk enggau perengka dikena ngaga rumah.
Semua bantu ungkup 14 iku ketuai ruang bilik nya sepenyampau RM65,650.
Sida ke nerima bantu nya ari 3 buah genturung pendiau iya nya ari Haji Baki, Muara Tebas enggau Tupong Jaya.