Agih belanja RM5 juta nyaup ngemujur RTP ba tetiap DUN
KUCHING: Agih belanja RM5 juta nengah Program Ubah Menua Pesisir (RTP) ungkup tetiap Kaban Kunsil Nengeri( ADUN) Barisan Nasional(BN) mulaika pemaik ngagai kandang menua pesisir.
Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Datuk Fatimah Abdullah madah,agih belanja nya mai empas besai ba pekara pemansang di menua pesisir.
“Nengah agih belanja nya, tetiap ADUN ulih ngaga projek ungkup timpuh setaun tauka lebih sereta mantu program pemansang di menua pesisir.
“Ungkup kami( bala ADUN) belanja nya chukup beguna amat laban ulih dikena ngaga balai mayuh guna, padang futsal, ngemanah jematan tauka ngemanah sekula sereta pengawa bukai,’ ku iya.
Fatimah mansutka jaku nya pengudah ngemujur pengawa nyuaka bantu belanja ngagai orang ke tasah ba penusah angus ke bisi nyadi ngelingi Mengeri Kuching.
Ba pengawa nya iya mega bisi nyuaka bantu belanja ngagai sekeda NGO.
Iya ke nyadi ADUN Dalat nambah, bala ADUN BN ke bukai pan berasai lantang enggau agih belanja RM5 juta ti udah nyaup sida ngemujur RTP ba tetiap DUN diri.
Ku iya, belanja ke disedia perintah nengeri nya dikemendar sereta dipunka Tok Nan lalu ditampung Kepala Menteri Datuk Amar Abang Johari Tun Openg.
Ba pengawa kemari, 14 ruang bilik ari Genturung Pendiau Haji Baki, Muara Tebas enggau Tupong Jaya bisi nerima bantu ari Fatimah nengah Opis Pengintu Pengelantang Pendiau(JKM).
Tujuh belas NGO nerima agih belanja ari Fatimah dikena bejalaika aktiviti gerempung.
Bela datai Pemantu Direktor Bagi Operasyen Opis Bomba Sarawak Tiong Ling Hii.