Tiga sekula di Julau dikeandal nyulut ba UPSR nengah program iM S’wak
JULAU: iM Sarawak andal nengah pogram Bengkel Ujian Penilaian Sekolah Rendah (UPSR) ke diatur sida pengelama tiga hari apin lama ke udah deka nyungkak pemutus peresa raban nembiak sekula ari Sekula Primari (SK) Nanga Dayu, SK Nanga Kara enggau SK Nanga Kota ke ngulu program nya.
Nitih ku penerang berita kemari, bengkel tu endang nyadi sebagi ari Projek Nyungkak Penyulut Sekula iM Sarawak diatur tiga taun bejurut ba ketetiga buah sekula nya.
Batang tuju bengkel tu kena nyikap bala nembiak enggau teknik sereta strategi nyaut ti dipinta nentuka pemutus pemadu manah dalam peresa sereta nelebaka sida enggau tanya UPSR.
Kelimpah ari nya, tuju bukai ngambika bala nembiak nemu chara meresa baru saut ke udah diberi sereta dikena nambahka penyampau pas dalam peresa UPSR ba ketetiga buah sekula nya.
Rambau bengkel nya mega, bala pesereta diberi licha peransang, diajar chara belajar ti betul, nerima chara baka ni nempa disiplin diri enggau pengawa ti patut dikereja lebuh nyaut UPSR.
Atur bengkel nyengkaum semua subjek ungkup peresa UPSR lalu tu kedua kali bengkel ke bansa nya dipejalai.
Tagit projek tu ngangkatka pemanah pengawa nguasa Jaku English enggau penyampau pas ba kesemua subjek dalam UPSR, nyapai pemutus ti manah ba taun keterubah.
Tu nyengala dipeda ba pemutus UPSR 2016 ke alai ketetiga sekula ngerikot jauh nyulut ba bepelasarka pemutus penuh.
Penyulut nyengala endar dipeda ba SK Nanga Kota ke alai penyampau sida pas nambah ari 38 peratus dalam taun 2015 ngagai 100 peratus 2016.
SK Nanga Dayu enggau SK Nanga Kara bela nyapai penyampau pas nambah 19 peratus enggau tiga peratus.
Chairman Kaunsil Penyanding Penemu iM Sarawak, Datuk Joseph Salang Gandum, ke mega Kaban Parlimen (MP) Julau madah, iya berasai gaga endar meda asil ti manah ari Projek Nyungkak Penyulut Sekula iM Sarawak lalu sida ngarapka ulih nempa momentum pemujur.
“Kami di Sarawak andal amat pelajar nyadi kunchi ngagai pengidup dudi hari ti menyana agi ungkup komuniti kitai.”
Ku Salang nambah, kelimpah ari bengkel UPSR ninting taun, iM Sarawak mega nyediaka bup malin, bup kereja tanya model UPSR, bup cherita, perengka bantu ngajar tauka kereban baka projektor, laptop enggau mesin chelak ngagai sekula.
“Tuju semua tu ngemuntangka pengawa ngajar enggau belajar ngagai tiga buah sekula tu.
“Aku ngarapka bala pesereta ulih ngiri pengelandik ti dipelajar sida ba bengkel ungkup penyulut dalam peresa ke bukai sereta ba pengidup sida mega,” ku iya.
Projek Nyungkak Penyulut Sekula iM Sarawak dipejalai enggau kerejasama Opis Pelajar Nengeri Sarawak enggau Opis Pelajar Pelilih Julau.