Hope Place nganjung bantu ngagai dua ruang bilik ke seranta
KUCHING: Hope Place bisi ngabas orang tuai, sepasang melaki bini, ke diau di Puncak Borneo lalu rumah seduai enda ulih dilawa ngena kerita.
Urung 30 minit bedarat nengah jalai babas napatka rumah Tomi Puroi, 59 taun, enggau bini iya, Senai Jerayit, ti nadai disikap ngena bekal elekterik enggau ai, pia ku penerang berita nya.
“Tomi nimbun ai ujan dikena mandi enggau berapi maya musim kemarau. Iya bedarat urung lima minit ngelawa sungai ke semak, nyauk ai enggau mandi. Rumah Tomi mega nadai bilik mandi enggau agu.
“Senai ditepan penyakit darah tinggi enggau ampus. Taja pengidup seduai betapi enggau pemar, tang Tomi berasai temegah ati laban anak lelaki iya seiku aja, Ralph Davis, 14 taun, seiku pemain hoki dalam Lumba Malaysia (SUKMA) ngarika Sarawak,” ku penerang nya.
Nitih ku Hope Place, Ralph Davis, bedarat 30 minit ari rumah ngagai jalai besai nganti bas maya nurun sekula.
“Ketegal bejalai nengah tanah, iya nadai chara bukai kelimpah dulu ngena selipar lalu nukar ngagai kasut sekula lebuh datai ba jalai besai.”
Tomi nyual buah nanas enggau sayur dikena ngulihka belanja entara RM200 ngagai RM400 sebulan dikena melanja anak iya besekula.
Dikena nambahka belanja, Tomi mega bisi ngaga pegung taun nyin tadi, endur nupi ikan Kaloi.
“Diatu kami agi ulih idup. Kami endang begunaka bantu orang bukai nyaup kami ngaga rumah ti menyana agi enggau bisi karan. Tu nentuka anak aku ulih belajar maya malam hari.
“Kami ngena lampu kelita maya mala hari lalu anak aku betapi pemar deka belajar enggau ngaga kereja sekula iya. Rumah kami mega sekut sereta nadai ngembuan mija dikena belajar. Anak aku belajar ba atas geladak,” ku Tomi madah.
Pemungkal Hope Place, Kelvin Wan, udah nyuaka bantu barang pemakai baka berau, minyak makai, milo, garam, gula, ruti, mi, kain mandi enggau tilam ngagai Tomi.
“Rambau pejalai nya, Ketuai Tumpuk Pendiau, Giam Lama Jacob Achoi mega bisi nguluka Hope Place ngerandau seiku orang nyelai pendiau (OKU), lelaki, ti begunaka susu khas enggau lampin.
“Jason Michael ( OKU) beumur 11 taun, ada nyadi nembiak cerebral palsy. Jason buta, singkung enggau isu. Ninting bulan, iya begunaka dua ngagai tiga tin susu enggau lampin sais XXL.
“Apai indai Jason bela gawa di kilang di Bintawa lalu kurang penatai pemisi. Tu ngujungka sida suntuk belanja bebelika susu,” ku penerang nya silik.
Hope Place iya nya gempung ukai dikuasa perintah (NGO) ti bejalai ngabas ruang bilik seranta enggau kurang benasit nganjung sekeda bantu barang pemakai.
Dataika sehari tu, gempung tu udah mantu lebih ari 170 buah ruang bilik.
Hope Place tau dilawa nengah lumur 013-567 2775 082- 683 378 berengkah ari pukul 8.30 pagi nyentuk 12 tengahari, enggau pukul 2 lemai ngagai pukul 5 lemai, Hari Satu ngagai Hari Lima sereta mega Hari Enam berengkah ari pukul 9 pagi nyentuk pukul 12 tengahari.
Mensia mayuh tau nganjung pemeri ngagai Hope Place nuju lumur akaun Maybank 5112-8900-1160. Bala sida ulih minta resit ari Hope Place.