ASADIA bisi muka kelas belajar nusuk marik empang: Mabong
KUCHING: Marik empang tauka tangu seiti ari ngepan asal Iban ti digaga ngena leka marik dikena ngias tauka ngelagu rekung kitai indu Iban, ti agi ditanka bansa kitai taja pan buah chura marik moden majak ngerembai senipak enggau segang pemansang.
Asil, chura enggau buah marik empang ti digaga tu meri bida enggau penyelai bansa kitai ari bansa bukai.
Pengawa ngaga tauka nusuk marik empang ke ditampung ari orang ke tuai ngujungka marik empang asal bansa kitai tu mengkang dikena bala indu maya pengerami Gawai sereta bisi mega dikena maya bisi pengerami besai.
Kitai arap bendar pengawa begaga tauka betu- sukka marik empang tu ke ditampung ari orang ke tuai ulih ditan sereta enda mudah punas ngapa.
Kebuah pia, laban bisi sekeda gerempung Iban di nengeri tu bisi ngatur kelas ngajar ngaga tauka nusuk marik empang ke dipasuk berengkah ari rebaik biak ngagai ke tuai.
Akademi SADIA (ASA- DIA) iya nya sebengkah gerempung ti bisi ngatur kelas ngaga tauka nusuk marik empang ti dibuka ngagai orang ke diau di bagi menua Kuching, Kota Samarahan enggau ke ngelingi mengeri tu.
Nitih ku ketuai ASADIA Mabong Unggang, tuju kelas nya diatur endang dikena meri peluang ngagai raban bansa kitai Dayak belajar seraya ngetanka ngepan asal nya.
“Tuju kelas tu diatur endang dikena meri enggau nambahka pengelandik sida ke endang udah nemu ngambika majak sikar sereta landik ngasilka marik empang nyengkaum ke moden.
“Objektif kelas tu ditumbuhka mega dikena ngetan, nampung, ngemansang enggau ngerembaika pengelandik ngaga tauka nusuk marik empang.
“Ngena chara tu akademi ulih mantu sereta nyaup bansa ngetanka ngepan asal kitai Iban,” ku iya madahka ngagai Utusan Borneo.
Nambahka nya, Mabong ngarapka pengelandik ke diulih ari kelas nya ukai semina ke dikena ngias diri aja tang dikearapka ngelui ari nya.
Iya ngarapka pesereta kelas nya ulih nyadika pengawa ngaga tauka nusuk marik empang nya seiti ari dagang ke ulih mantu nambahka penatai pemisi diri.
“Aku arapka udah tu mayuh agi bansa kitai sama deka enggau belajarka pengawa ngaga ngepan asal kitai laban tu ukai semina dikena ngetanka iya tang mega ulih mantu nyungkak tauka nambahka penatai pemisi ruang bilik,” ku iya.