Pampang SEBERKAS diperansang chakah agi ngansak raban nembiak
KUCHING: Semua 82 pampang Pertubuhan Belia Kebangsaan Bersatu Sarawak ( SABERKAS) di serata nengeri tu diperansang ngambika chakah agi ngansak raban nembiak nengeri tu.
Menteri Muda Bekal Elekterik ti mega Sekretari Besai SABERKAS Nengeri Sarawak, Dr. abdul Rahman Junaidi madahka tanggungpengawa SABERKAS nempa raban nembiak ti regas, bepengerai sereta chakah nyereta mayuh bengkah pengawa ke ulih dikena ngemansangka diri enggau menua.
Kebuah pia ku iya, laban raban nembiak tu mih ti dikearapka nampung ngiring menua jemah ila.
“Aku ke nyadi Sekretari Besai SABERKAS Nengeri Sarawak, deka minta semua 82 pampang SABERKAS di serata nengeri tu regas ngansak raban nembiak ba endur sida.
“Ajar raban tu nyadi nembiak ke regas, tempa meh anak Sarawak ti regas, sikar, bepengerai sereta ulih berunding jauh kelimpah ari ngambi bagi dalam mayuh bengkah bidang dikena ngenegapka agi tanggungpengawa sida jemah ila.
“Laban juluk kitai deka nempa ketuai tauka pengiring menua ti bisi berkaliber enggau berkebolehan ngiring nengeri Sarawak jemah ila,” ku iya.
Dr. Rahman mansutka pekara nya lebuh bejaku bejadika ‘Majlis Perasmian Program Sumbagan Amal SABERKAS & Ekspo Mini Kediaman Rumah’ ke diatur SABERKAS pampang Kota Sentosa begulai enggau SABERKAS pampang Pantai Damai ba sebengkah palan bebeli barang ditu, kemari.
Nambahka nya, Dr. Rahman ti mega Kaban Kunsil Nengeri Pantai Damai madahka diri temegah ati ngagai kededua pampang nya ke mujur nyadi pampang keterubah ti ngatur pengawa pengasih nya.
Iya ngarapka pampang SABERKAS ke bukai di nengeri tu ulih neladan tauka bechuntoka pampang Pantai Damai enggau Kota Sentosa nya.
“Aku ngenataika perambu ngagai kededua pampang enggau MYDIN Bandar Baru Samariang, ngambika nyadika program tu program ninting taun jemah ila.
“Laban nengah program tu raban nembiak ulih bekunsi penemu enggau pengelandik dalam sekeda bidang nyengkaum ba pengawa dagang.
“Nengah program ke baka tu mega kitai ulih ngempung sereta ngempuruka raban biak enda ngira bansa enggau jalai pengarap,” ku iya.
Nyerumba pengerami bejadika program nya kemari,. Dr Rahman diberi basa nyuaka kereban dalam rumah ngagai 10 ruang bilik ke begunaka bantu nya.
Nitihku Chairman SABERKAS Kota Sentosa, Jamex Voon, program nya diatur berengkah kemari ngagai 30 Julai tu ba MYDIN Bandar Baru Samariang.
Bisi 35 raban ti melanja nyengkaum kompeni ke melanja nyereta pengawa pemandang bisi ngambi bagi ba program nya.
“Kitai ngelaluka mensia mayuh datai ngagai pengerami ke diatur kami tu, lalu Hari minggu tu ila bisi urung 400 iku nembiak ari 14 buah sekula primari ke dipilih.
Sama bisi datai ngagai pengerami nya kemari bini Dr Rahman, Siti Shorgayah Zaidin enggau ke bukai.