Skuad 24/7 ulih ditumbuh nyema bisi peminta
Tuju penumbuh tim tu dikena ngemuntangka mensia mayuh ngenataika sebana ngagai opis bekuasa
SIBU: Projek pemungkal dikumbai Skuad 24/7 tau LA Serve ulih ditumbuhka piak kaunsil kandang menua (PBT) di bagi menua bukai di nengeri dudi hari nyema bisi peminta.
Menteri Muda Kaunsil Kandang Menua Datu Dr Penguang Manggil madah, enam PBT iya nya Komiti Pemansang Bintulu (BDA), Kaunsil Mengeri Padawan ( MPP), Kaunsil Mengeri Kota Samarahan (MPKS), Kaunsil Pelilih Sri Aman (MDSA), Kaunsil Mengeri Sibu (MPS) enggau Kaunsil Mengeri Miri ( MBM) udah dipilih numbuhka tim pemungkal nya.
“Bepun ba enam PBT tu, kitai ulih numbuhka baru tim tu ba PBT bukai nyema bisi peminta, nyema chara nya dipeda ngasi sereta ngurangka sebana mensia mayuh sereta nambahka pemanah servis PBT,” ku iya.
Penguang ke mega Kaban Kunsil Nengeri ( ADUN) Marudi madah, keenamenam PBT ke dipilih enda nyengkaum MDSA deka nerima sebuah kerita pikap enggau dua motosikal.
Iya madah, tuju penumbuh tim tu dikena ngemuntangka mensia mayuh ngenataika sebana tauka isu ngagai piak bekaul.
“Tu mega dikena nentuka piak kaunsil lebih muntang ngereja pengawa sereta mutarka sebarang penanggul enggau pengelemi sebedau mensia mayuh ngenataika sebana,” ku iya.
Menteri Kaunsil Kandang Menua enggau Pengawa Berumah, Datuk Dr Sim Kui Hian madah, bepelasarka lumur servis, PBT nerima sebana ke pemadu mayuh bekaul enggau ejensi perintah taun nyin kemari aja bisi 9,468 iti sebana.
Bekau ari sebana nya, isu ngaduka jalai bisi 3,254 (26 peratus), ditangkan parit ( 2,648), landskap ( 1,773), pemeresi ( 908) enggau penerit adat (885).
Tu mega dikena nentuka piak kaunsil lebih muntang ngereja pengawa sereta mutarka sebarang penanggul enggau pengelemi sebedau mensia mayuh ngenataika sebana. Datu Dr Penguang Manggil Menteri Muda Kaunsil Kandang Menua