Semua kaban JKKK diperansang besaup ngemujurka program pemansang

SARATOK : Kaban Komiti Pemansang enggau Pengelikun Genturung Pendiau (JKKK) patut nyingkang seriris enggau pemansang kemaya hari dikena nentuka genturung pendiau sida terus maju.

Residen Betong Friday Belik madah, genap kaban JKKK patut nyingkang sereta kelimpah besaup ngemujurka sebarang program ungkup pemansang ba genturung pendiau diri.

“Nadai agi jaku semina bekerendut tubuh tauka ngandalka perintah, tang patut ransing besaup nyapai juluk nya.

“Pia mega, semua kaban JKKK patut besaup ngereja pengawa ke pemaik genturung pendiau diri,” ku iya.

Iya madah munyi nya ba jaku iya ke dibacha Pemesai Opis Kunsil Sarawak ba Opis Residen Betong Florence Bulan Johnny rambau Pengawa Nyuaka Setipikit enggau Perais Pekit Anugerah Desa Perdana (ADP) Renggat Menua Betong ditu, ensanus.

Friday madah, nyema semua kaban JKKK ngembuan runding baka nya, tentu semua genturung pedniau ba nengeri teulihka pemujur, mayuh ba mayuh sukut.

Nya alai, ku iya, pengawa ti ngemeratka profil genturung pendiau ba semua JKKK rumah panjai ngagai kampung Melayu enggau kampung China di nengeri tu endang disukung.

“Anang ngumbai dokumen nya nadai guna laban kebendar semua penerang bisi dirikod dalam nya nyengkaum pekara pemansang pasal genturung pendiau kita,” ku iya.

Nya alai, ku iya Pekit Desa Perdana diatur Opis Residen begulai enggau Opis Pemansang Raban Bansa ( KEMAS) ba semua bagi menua endang pelasar ungkup komuniti ngemansangka genturung pendiau diri.

Nya alai, ku iya pengawa baka tu sigi patut ditampung ba taun dudi dikena nerenakka pengerindu enggau semangat ngagai JKKK ngemansangka genturung pendiau ba mengeri.

Udah nya, Friday madah endang udah nyadi seiti tanggungpengawa chairman JKKK enggau nembiak redak iya besaup ngemujurka aktiviti genturung pendiau.

“Saup ari raban sida deka ulih mantu perintah ngemujurka pemansang ba genturung pendiau. Pia mega JKKK patut ngena peluang ke bisi nengah pengawa nyereta aktiviti ke meri pemaik,” ku iya.

Taun tu bisi enam genturung pendiau bepekit ba tikas menua Betong, iya nya mungkur tiga kategori genturung pendiau asal enggau tiga kategori rumah panjai.

Pengawa meri poin ngagai genap genturung pendiau nya bepelasarka sukut patriotisme, ekonomi enggau pengawa dagang, ngenegapka tanggungpengawa nembiak, teknologi pemadah enggau telekomunikasyen, pemeresi, pengerai enggau pemanah perengka ba genturung pendiau.

Inisiatif Anugerah Desa Perdana diatur dikena meri peneleba ngagai komuniti ke diau ba rumah panjai.

Kelimpah nya dikena nerenakka ulah sida nyadi ketuai ti bisi pengelandik, chara nyadi ketuai enggau ngatur pengawa ba rumah panjai.

Tu endang setipak Transformasyen Menua Peisisr ke datai ari buah penemu, Opis Menteri Pemansang Menua Pesisir enggau Kandang Menua (KKLW) bekaul enggau iring ketuai ke manah.

Ungkup taun tu, kategori genturung pendiau kategori tradisional dipenggi Kampung Wawasan Baru Melango, Saratok (champion ), Kampung Baru Kabong (lumur dua) enggau Kampung Perpat, Kabong (ketiga).

Udah nya, ba kategori rumah panjai Rumah Lembang, Engkudu, Saratok (champion), Rumah Alexander, Bebuling Atas, Betong (lumur dua) enggau Rumah Siti Jubidah (ketiga).

Bala pemenang bela nerima pulai perais duit sereta setipikit penyereta.

Genturung Pendiau enggau rumah panjai ke mujur deka dianjung bepekit ungkup tikas nengeri kena sehari tu (29 Julai) ba Sibu.

Bela bisi datai Pemesai KEMAS Betong Peggy Ann Iba Matu, Pemesai KEMAS Daerah Saratok Muhammad Iqbal Abdullah, bala ketuai opis perintah enggau ke bukai.