Piak pengatur BCF meseti ngemeratka sukut pemeresi

SIBU: Kelimpah mandangka pekara main asal, sukut pemeresi palan program mega patut dikemeratka piak pengatur sekumbang Pengerami Main Asal Borneo (BCF).

Sapit Kepala Menteri Datuk Amar Douglas Uggah Embas madah, tu muntang dikereja nengah chara nyendiaka perengka baka tong uras, agu bersih sereta disambung ai ngagai palan pengerami.

Tu ku iya, berindik ari pemayuh mensia ke datai sereta raban pedagang bejualka bemacham pemakai maya pengerami.

“Nengah chara tu, kitai ulih nyeliah penyakit ari ke ngena perengka dapur ti kamah.

“Kelimpah nya, ngena perengka dapur ti kurang asap mega deka mantu nyaga pemeresi rampa menua,” ku iya rambau nutup Panggau Main Asal Dayak Borneo (BDCF) nyerumba BCF 2017 ba Dataran Bandar Sibu, malam ensanus.

Uggah diarika Sekretari Politik Kepala Menteri, Thomas Romeo Christopher Tegong. Sama datai Sapit Chairman Kaunsil Mengeri Sibu (MPS), Rogayah Jamain, Chairman Pengatur BDCF Paulus Dandi, Temenggong Stanley Geramong, Pemancha James Semilan sereta ke bukai.

Ngelansa silik pasal BCF, Uggah madah penyampau pesereta enggau temuai ke majak nambah mandangka pengawa ngatur BCF tejapaika juluk.

“Kitai ngarap nembiak rebak baru ulih ngetan sereta nyaga pesaka tu ungkup nembiak rebak dudi,” ku iya seraya madah juluk besai BDCF iya nya deka ngetanka penulin main asal Dayak begembar enggau alun pemansang dunya moden.

Iya mega madah, BCF en- dang sebengkah ari inisiatif dikena ngerapitka takah bansa Dayak enggau bansa bukai, lebih agi gerempung ukai perintah (NGO) Dayak nengah penyereta sereta sukut ba aktiviti ke bisi diatur.

Nengah pangka dunya siber diatu ku Uggah, Sibu enda tinggal ari ngasaika arus dunya moden nya.

“Nyangka enda lama agi, nengah polisi langit ke baru menua Sibu deka ulih dilawa terus ari mayuh bengkah endur ba menua tu enggau ari menua luar.

“Nya alai, kitai patut nentuka program BCF tu nyapai standard entarabansa dudi hari ila seraya meri peluang ngagai bala pedagang,” ku iya.

Ba pengerami nya, Uggah bisi madah deka ngungkupka geran projek mit menua pesisir (MRP) RM30,000 kelai sukung ngagai program nya.