Mayuh agi pabu penemu pasal SBKPS PERKESO

MIRI: Penemu mensia mayuh pasal Skim Ditinggang Penusah Ketegal Gawa Kediri Empu (SBKPS) PERKESO ditu agi pabu.

Menijar Opis PERKESO Miri Hendera Saiful madah, sekumbang udah dibuka 1 Jun tu tadi, skim nya agi kurang nerima timbal lebih agi ari raban sida ke bejalaika servis teksi.

“SBKPS nya kebendar ungkup deriba teksi ke gawa kediri empu tauka orang bukai ke bejalaika servis sebaka nengah Skim Penyaga Pengelikun Rama,” ku iya rambau aum pemberita ditu lemai ensanus.

Ku iya, tuju tu dikena nyaga sida nengah insurans lebih agi sida ke gawa kediri empu maya ditinggang penusah lebuh ke gawa tauka maya ba rantau jalai.

Kenukuiya,piakPERKESO Miri bisi bejalai ngabas lalu lebih numpu ngagai sitak Padang Bilun Miri.

“Timbal sida pengudah kami nerangka pasal skim nya chukup manah.

“Sida bisi nanya pasal chara minta enggau penguntung ari skim nya, tang rikod sida ke ngerejista nengah chara ‘online’ tauka datai ngagai opis PERSEKO kelalu mimit.

“Entara kebuah engka agi kurang mereti pasal skim nya,” ku iya.

Nya alai, ku iya PERKESO Miri ngatur sebengkah licha servis teksi nyengkaum teksi murah, teksi rasmi, limosin enggau teksi padang bilun ngambika sida mereti pasal skim nya ke dipelaba deka diatur bulan September ila.

Skim nya ku iya, bisi nyendiaka bantu belanja ngagai deriba teksi enggau sida sebilik maya ditinggang penusah enda disadang kelimpah bisi disediaka perubat, enggau bantu bukai.

“Skim nya mungkur penusah bebadi baka maya bejalaika pengawa, maya ba rantau jalai deka nurun enggau pulai gawa, enggau dituntung penusah bebadi maya bisi penusah ngenyit,” ku iya.

Ku iya, sida ti deka nemu penerang silik pasal skim tu ulih peda ba laman web

tauka ngelawa opis PERKESO Miri tau mega betelefon nuju lumur 1-300-22-8000 tauka 085- 419 800 ( PERKESO Miri).

Ngelansa pekara bukai, Hendera madah naka tu piak sida bisi ngemansutka penyalah kompaun penyampau RM25,000 ungkup dua penyalah iya nya 26 notis dipansut ketegal puntan ngerejista palan kereja penyampau RM20,500 lau lapan notis ungkup penyalah puntan ngerejista pengereja pengawa enggau penyampau RM4,500.

“Tu asil ari Ops Kesan 2017 kena bulan April ke dipejalai raban penerit adat ninting hari ungkup bala pengaji ke liat ati enggai nitihka Akta Keselamatan Sosial Pekerja 1969 sereta undang-undang Keselamatan Sosial Pekerja 1971,” ku iya.

Tambah mega, ku iya nyentuk bulan Jun 2017, bisi 72 pengaji udah dilawa nengah Ops Kesan.