Pesta Kapit dilanjar ngagai 11 - 20 Ogos

KAPIT: Pengerami Pesta Kapit, Eksibisyen Pengawa Dagang, Karnival Penguna enggau Anugerah Carta Sapa Juara (ACSJ) ke ditaga diatur kena 28 Julai ngagai 6 Ogos tu dilanjar ngagai 11 nyentuk 20 Ogos ba Padang Bilun Lama Kapit.

Sapit Residen Kapit, Galong Luang madah semina sekeda program diatur ba i Dataran Bandar Kapit.

Pengerami bejadi Pesta Kapit, Eksibisyen Pengawa Dagang, Karnival Penguna enggau Anugerah Carta Sapa Juara ke diatur kena 12 Ogos dipelaba deka dipenyadika Sapit Menteri Pemansang Menua Pesisir enggau Kandang Menua, Datuk Alexander Nanta Linggi.

“Udah nya nutup pengerami kena 20 Ogos dipelaba dipenyadika Sapit Kepala Menteri, Tan Sri Datuk Amar Dr James Jemut Masing,” ku iya rambau aum komiti pengerami nya ba Kompleks Perintah Nengeri ditu.

Entara program ke bisi diatur nyengkaum pengawa pemandang ari mayuh bengkah ejensi perintah enggau sektor korporat, eksibisyen pemakai, eksibisyen pengawa dagang, palan bemain enggau panggau pemerindang ti dikemujurka raban penanyi Iban.

Entara artis ke bisi dikangau iya nya Melissa Francis, Florence Lo, Sima Tawil, Angela Lata Jua, Julita James, Linda, Ricky El, Rickie Andrewson, Zamery Amera, Gabriel Fairuz Luois dan Raban Tembawai Kanyuk sereta Bunyau enggau Mujap.

Berebak enggau nya, entara program ke diatur iya nya Iron Man Kapit, Nginti, Pekit Kumang Pesta Kapit, Kapit Idol, kus kraf jari, pekit nyura ungkup anak mit, nyumai, Interaktif Penguna Pintar enggau mayuh agi ke bukai.

Program penutup iya nya lumba bot laju ba hari kepenudi enggau pekit final Anugerah Carta Sapa Juara.