JKKK rumah panjai dikearap mayuh nyereta ADP ke dudi hari
SIBU: Residen Sibu Hii Chang Kee meransang mayuh agi Komiti Pemansang enggau Pengelikun Genturung Pendiau ( JKKK) rumah panjai enggau timpuk pendiau ngambi bagi ba Anugerah Desa Perdana (ADP) dudi hari ila dikena ngelai pengelebih ari orang bukai.
Ku iya, ADP ti bepelasarka juluk Program Transformasyen Menua Pesisir betuju nempa komuniti rumah panjai ulih besemekih, panjai runding, bepenemu, ulih gawa kediri sereta mereti maya gawa.
“Kelimpah nya, tu mega dikena nempa ayu 1Malaysia patriotisme merdeka enggau ulah menyana ke bukai mungkur pekara bansa, adat enggau penatai.
“Iy amega meransang gen- turung pendiau ngembuan rampa menua ke manah, meri penguntung sereta besai gaji manggai taun 2020,” ku iya rambau Pengerami Nyuaka ADP Sibu, ensanus.
Pengerami nya diatur Opis Menteri Pemansang Menua Pesisir enggau Kandang Menua begulai enggau Opis Pemansang Komuniti (KEMAS).
Kenu ku iya, ADP endang bepelaska sekeda sukut ke beguna nyengkaum patriotism enggau pendiau komuniti, nyadi ketuai enggau atur pengawa, pelajar sereta latih, ekomoni enggau pengawa dagang, ngemansangka tanggungpengawa nembiak, teknologi pemadah enggau komunikasyen, pemeresi, pengerai enggau pengelantang kelimpah matau perengka guna pun.
“Kami endang nyukung buah penemu ari KKLW enggau KEMAS ti deka bejalaika pekit baka tu ungkup gentrung pendiau lama sereta rumah panjai.
“Pengawa bala tu mega deka nyungkak pemansang ba menua pesisir nyadi sebengkah sitak maju, mayuh mensia, lantang setipak enggau juluk menua maju manggai taun 2020,” ku iya.
Berebak enggau nya, Hii mega minta semua JKKK genturung pendiau lama ke rumah panjai ba Sibu ngambi beratika sukut pekara ke diberi poin ungkup ADP.
“Tuju kitai kebendar ukai dikena ngulihka diri menang ba pekit nya tang nguna peluang nyereta pekit nya dikena ngemanahka rampa menua ba genturung pendiau diri,” ku tandu iya.