Program nuchuk vaksin ‘antirabies’ nerima sukung manah
Ba Program nya JPVS nagit nuchuk vaksin ngagai urung 5,000 iku ukui dikena nyeliahka ari dirampit penyakit rabies
KUCHING: Program nuchuk vaksin ‘ anti- rabies’ ngagai ukui ti diatur ba Gelanggang Bola Keranjang, Jalai Arang nerima sukung ti manah ari mensia mayuh, kemari.
Dipelabaka lebih ari seribu iku pengempu ukui bisi datai nganjung ukui sida betuchuk vaksin anti-rabies ti nadai bebayar nya.
Nya ngayanka penyedar enggau pengibuh mensia mayuh kelebih agi ti ngempu ukui nya bekaul enggau penyakit ukui gila tauka rabies ke benung nyadi di nengeri tu lebih agi di bagi menua Serian, Kuching enggau Sri Aman.
Nitih ku penerang Pegawai Veterinar, Dr. Sylmie AlHarir kemari, Opis Servis Veterinar Sarawak (JPVS) nagit urung 5,000 iku ukui dituchuk vaksin nya dikena nyeliahka ari dirampit igi penyakit rabies.
“Kami bisi nyendiaka semilan iti kaunter lalu te- tiap kaunter bisi lima iku ti lalu betuaika seiku pegawai veterinar.
“Juluk kami nengah program sehari tu deka nuchuk 4,500 iku ukui tang enti ulih kami deka nuchuk enda ngira pemayuh ukui.
“Sapa ke datai kami tetap nerima, kami deka meri vaksin ngagai enda ngira pemayuh ukui, sekalika siku orang mai 14 iku ukui pan kami tetap deka nuchuk vaksin, tang ke pemadu beguna kerejasama ari pengempu ukui.
“Program tu nyentuk pukul 4 lemai, lalu enti muak ke lemai vaksin majak mimit kami deka minta makmal ngajung bekal vaksin,” ku iya lebuh dikerandau raban pengarang berita ba palan nya kemari.
Berebak enggau nya ku Dr Sylmie, sida (opis veterinar) mega ngelalau pengempu ukui, ngambika ngurung ukui ke udah diberi vaksin nya.
“Kami minta sereta ngelalau pengempu ukui ngambika ngurung ukui sida sereta anang meri ukui nya mandi dalam timpuh seminggu.
“Kami mega bisi nyendiaka keteras penerang ke ditulis dalam mayuh bansa jaku, dikena meri penyedar sereta ngajar mensia mayuh sentang pekara ke patut dikereja nyema bisi diketup ukui,” ku iya.
Kelimpah ari nya, Tan Kai ke nyadi Ketua Nembiak SUPP lebuh dikerandau ba palan nya kemari, madahka diri temegah ati enggau sukung sereta sambut ari mensia mayuh.
Iya madahka SUPP udah mantu JPVS, Opis Pengerai sereta Opis Menteri Kandang Menua enggau Pengawa Berumah ngelancharka program meri vaksin anti rabies nya kemari.
“Kami (SUPP) ditu nulung opis ke bekaul nya ngiga palan endur ngatur program tu, nguduka bala Rela ke nyaga jalai, meresi kemi enggau tai ukui ba gelanggang tu kelimpah ari mantu JPVS meli barang pemakai awakka sida ulih mekuh sereta nuchuk naka pemayuh ukui ke dianjung,” ku iya.
Sapa ke datai kami tetap nerima, kami deka meri vaksin ngagai enda ngira pemayuh ukui, sekalika siku orang mai 14 iku ukui pan kami tetap deka nuchuk vaksin, tang ke pemadu beguna kerejasama ari pengempu ukui.