UPP mantaika nama chalun ulih menang ba Sibu, Lanang

Andrew Wong enggau Andrew Ting dikeandalka UPP ulih menang ba penuduk Sibu, Lanang maya PRU14

SIBU: Parti Rakyat Bersatu (UPP) mantaika nama Dato Andrew Wong Kee Yew enggau Andrew Ting Kee Nguan nyadi chalun ke ulih menang ba penuduk Parlimen P.212 Sibu enggau Parlimen P.211 Lanang ungkup Pengawa Bepilih Besai Ke-14 (PRU14) ti deka datai.

Pekara tu udah dibantaika Presiden UPP ke lalu nyadi Menteri Wang Kedua, Dato Sri Wong Soon Koh ba sebengkah program merarau di Hotel Kingwood ditu, kemari.

Andrew Wong, 41 taun, ke nyadi Chairman Kaunsil Servis Komuniti UPP Sibu sereta ex-Sapit Chairman Kaunsil Mengeri Sibu (MPS).

Udah nya, Andrew Ting, 41 taun, seiku orang dagang sereta nyadi prinsipal sebuah tadika peribit ditu.

Bejaku ba program nya, Soon Koh madahka UPP bisi tanggungpengawa ngirai chalun pengari rayat ti ulih menang ungkup Parlimen Sibu enggau mega Parlimen Lanang.

“Nyadi rayat Malaysia enggau peranak Sibu, kitai bisi tanggungpengawa ngirai pengari rayat ti ulih menang ungkup sitak Lanang enggau Sibu.

“Nya alai, kitai nyadi kaban UPP meseti begempung ngirai pengari rayat ti patut diperunding ba kededua sitak menua tu,” ku iya.

Wong ke mega Menteri Dagang Antarabansa enggau E-Dagang madah, kededua chalun UPP nya agi biak sereta sedia gawa enggau komitmen, pengeran sereta seruran ngaul diri.

Berindik ari nya, iya meransang semua bala kaban parti bediri di belakang seduai, kelebih agi parti diatu nyabung rebak baru ngerampas kededua penuduk ari penyakal.

“Kitai ba UPP sedia meri awak ngagai rebak baru gawaka rayat lalu nyadi ketuai dudi hari.

“Aku ngarapka semua deka bekerejasama nyadi seiti tim laban kerejasama tu ungkup pemaik di mengeri Sibu dudi hari,” pia ku Kaban Kunsil Nengeri (ADUN) Bawang Assan.

Soon Koh mega madahka UPP deka mantaika nama chalun titaga ulih menang bediri minta pilih ba penuduk parlimen ke bukai udah tu.

Berebak enggau nya, UPP mega ngemendarka Perambu Sibu Keterubah (RS1), perambu pemansang lima taun berengkah ari taun 2018 nyentuk 2022.

Sama bisi datai Sapit Presiden UPP Datuk Dr Jerip Susil, Mandal Presiden Kanan Datuk Tiong Thai King, Mandal Presiden Kanan Dato Ranum Mina, Mandal Presiden ke lalu nyadi Ketuai Nembiak UPP Dr Johnical Rayong, Sekretari Besai George Lo sereta bala bukai.

Nyadi rayat Malaysia enggau peranak Sibu, kitai bisi tanggungpengawa ngirai pengari rayat ti ulih menang ungkup sitak Lanang enggau Sibu.