Australia dakwa gagalkan serangan
Tu ulih nyeliahka penyerakup ke ditanggam diatu pambar kelimpah nentuka pengelikun menua
KUCHING: Semua peranak Malaysia patut megai tanggungpengawa nempa kaul ti manah entara pupu bansa enggau penyerakup lalu ukai nyadi raban ti semina negika isu raban bansa enggau ektremisme, pia ku Pemesai Yayasan 1Malaysia (1M) Tan Sri Lee Lam Thye.
Nitih ku iya, ulah ti manah ulih nagang peranak Malaysia ari ke pambar kelimpah nyadi menua ti majak tegap.
“Tanggungpengawa besai tetiap peranak Malaysia ari pupu bansa, jalai pegarap sereta politik iya nya ngetanka penyerakup pupu bansa enggau jalai pengarap sereta nulak semua pekara ekstremisme ti tau ngeruga pengelikun enggau pengelantang,” ku iya dalam penerang berita, kemari.
Lee madahka, peranak Malaysia deka ngintu dua hari besai enda lama agi iya nya ngintu Hari Merdeka ke-60 kena 31 Ogos, enggau Hari Malaysia ke-54 kena 16 September.
“Tu meri peluang ngagai peranak Malaysia ngidupka baru runding talukka menua kelimpah nerenak pengelikun, integrasyen enggau penyerakup bansa ti nyadi pemun pemansang ungkup menua ke diuan pupu bansa,” ku iya.
Ku iya, talukka menua ukai semina dijadika pemandang tang runding ke patut bisi dalam kitai semua seumur idup sereta nyadika kelai kitai peranak Malaysia.
Talukka menua ukai semina bisi maya bulan Ogos aja, tang patut terus dikembuan dalam ati peranak Malaysia ti angkunka menua sida.
Ku iya, Malaysia tau nyadi chunto ngagai dunya nyema peranak menua tu bebasa sereta bebasaka bida entara pupu bansa kelimpah dikena ngenukuka penyerakup entara jalai pengarap ti bebida.
“Nyadi menua ti baru megai tampuk pemerintah kediri, bida penemu nyadi pekara ti patut diterima semua rayat.
“Bida entara kitai ukai nyadi kebuah ti tau ngasuh pambar tang ulah enda ulih bebatak asur ba bida penemu nyadika pun pekara nya nyadi,” ku iya.
Lee pechaya orang ti ngaku diri peranak Malaysia enda deka lenyau asal penatai sekalika bansa Melayu, China, India, Kadazan, Iban tau ka bansa bukai lalu sida patut nerima pangan diri nadai ngira bansa enggau jalai pengarap.
“Kitai patut temegah ati madahka diri peranak Malaysia laban tu ulih nerenak runding talukka menua sereta negutka tanggam kaul penyerakup,” ku iya.
Nyadi peranak Malaysia ti komited sereta talukka menua, ku iya, tetiap iku kitai patut ransing agi gawa nyaga pengelikun enggau pengelantang sereta ngetanka diri ari ulah ti seruran deka belaya ti deka ngasuh charut.
“Semua orang patut ngemeratka pekara ke besai agi iya nya ngempung penyerakup semua jalai pengarap enggau raban bansa lalu ukai nya salah guna pekara ti bekaul enggau bansa ke endang sensetif di menua tu,” tandu iya.
Ku iya, ‘penyerakup ari bemacham sukut’ nyadi perais pemadu berega ti patut dikenang semua peranak Malaysia lalu tiap iku kitai patut komited ngemeranka gaya pengidup ti likun, lantang enggau beserakup.
Iya mega ngansak mensia mayuh nyukung kimpin ‘Ekspresi Negaraku’ ti bisi juluk besai mantu nerenak runding talukka menua.
Lee madahka peranak Malaysia udah mantaika penaluk diri ngagai menua nengah mayuh macham chara.
“Sida ti masuk raban nyaga pengelikun sanggup berambunka nyawa sida lalu orang lumba ngasuh kitai temegah ati maya sida menang midul ba pekit renggat antarabansa.
“Peranak Malaysia mega udah ngayanka penyayau sida ngagai menua nengah pengawa mayar chukai ti tau dikena mantu orang bukai sereta ngemansangka menua,” ku iya.
Ulah ti ulih nitihka atur ngayanka penyiru sida ngagai menua, laban nya nyadi seiti ari lima prinsip Rukun Negara ti lurus, ku iya, seraya nambah, peranak menua tu mega ulih ngayanka penaluk diri ngagai menua ba pengawa negika isu rampa menua enggau mantu mutarka penanggul rama.
“Bala sida mega tau ngambi bagi dalam aktiviti ke pulaika pemaik ngagai komuniti baka pengawa beripai ti mantu nyaga pemeresi enggau pengelikun di genturung pendiau diri empu,” ku iya.
Tanggungpengawa besai tetiap peranak Malaysia ari pupu bansa, jalai pegarap sereta politik iya nya ngetanka penyerakup pupu bansa enggau jalai pengarap sereta nulak semua pekara ekstremisme ti tau ngeruga pengelikun enggau pengelantang. Tan Sri Lee Lam Thye Pemesai Yayasan 1Malaysia