ADUN Nangka tekenyit ninga terantang nama chalun UPP
SIBU: Pengawa Parti Rakyat Bersatu (UPP) ti udah milih chalun ke deka disabung maya Pengawa Bepilih Besai Ke-14 (PRU14) ungkup Parlimen Sibu enggau Lanang ensanus ngasuh Kaban Kunsil Nengeri (ADUN) Nangka Dr Annuar Rapaee tekenyit.
Kebuah iya tekenyit ku iya laban nadai sebarang randau tauka iya dikangau ngulu nama-nama pengawa bekaul enggau pengawa milih chalun ba dua iti penuduk nya.
“Terang aku madah, nadai randau diatur antara Parti Bumiputera Bersatu (PBB), UPP tauka Parti Sa’ati Rayat Sarawak (SUPP) enggau bala tuai ke bukai sentang pengawa milih chalun ke tau menang bediri ba Sibu enggau Lanang.
“Nya alai aku tekenyit ninga sida ( UPP) udah nerantangka manuk sabung sida maya PRU tu.
“Pia mega aku enda nemu program sida tadi ( kemari).
“Aku semina nemu program UPP tu sepengudah kaban aku madah nengah Whatsapp ti madahka UPP udah milih Dato Andrew Wong deka bediri ba parlimen Sibu lalu Ting Kee Nguan ba parlimen Lanang,” ku iya madah maya ditanya sentang pekara nya, kemari.
Annuar ti mega Menteri Muda Pelajar enggau Pansik Teknologi madah, iya ngelala sapa Andrew tang enda nemu sapa Ting.
“Maya aku nemu Andrew nyadi chalun UPP, keterubah aku tekenyit taja aku ukai orang ke patut nentuka sapa chalun sida.
“Aku semina ulih meri penemu enggau sukung tang sapa chalun ke dipilih nya bepanggai ba pemesai Barisan Nasional (BN),” ku iya madah baru.
Ku Annuar, iya tau enda ibuh alai ditanya tang laban ke nyadi ADUN Nangka, iya patut bendar diberi awak mantaika penemu sentang pengawa milih chalun tu.
Iya madah, iya endang sigi nundaka penemu pemesai BN sapa chalun ke patut dipilih ungkup dua iti penuduk nya tang laban DUN Nangka bela dalam Parlimen Sibu, iya bela ngembuan tanggungpengawa ke besai mai BN ngambi pulai penuduk nya ari penyakal.
“Ba BN, PRU tu enda sama enggau Pengawa Bepilih Nengeri (PRN) empai lama.
“Maya PRN 2016, BN menang di Nangka enggau penyampau majoriti 7,616 enggau urung 4,000 majoriti di DUN Bawang Assan tang alah di Pelawan.
“Tu patut dipeda kitai, chalun tu penting. Kitai enda ulih meda pemujur BN maya PRN suba deka sama baka PRU ti deka datai,” pia ku iya sambil madah tusah deka menang di Parlimen Sibu.
Kelimpah ari nya, Annuar mega madah, sida mega meseti meda pekara bukai laban mayuh piak bukai bela ngintai pekara tu, ukai semina UPP enggau SUPP tang bisi chalun ke bukai ngining penuduk nya.
Ba iya, chalun ke pemadu manah patut dipilih bediri ba Parlimen Sibu enggau matak mayuh sukung lebih agi ukai ari penyukung UPP tauka SUPP iya nya orang ke enda kala dipeda bisi enggau charut dalam dua bengkah parti nya.
“Enti kita milih chalun ke bisi enggau penyarut nya, piak ke enda dipilih enda lantang ati.
“Tu deka ngelemika pangan diri ngujungka enda bulih sukung ba Parlimen Sibu ila nyengkaum ngalahka sukung ari PBB ngagai sida,” ku iya madah baru.
Ba runding iya, Annuar madah, sukung ke kuat ari PBB Nangka ngagai chalun BN di Sibu nadai meri reti enti laya UPP enggau SUPP empai diputarka.
Bekenangka orang baru ke dipilih nyadi chalun, ba Annuar, pekara nya endang manah tang rayat meseti ngelala nyemetak sapa ke dipilih nya.
Ari nya, ku iya, chalun nya deka nerima sukung ke manah ari rayat maya bepilih ila lebih agi pengundi ke baru.
Maya PRU 13 suba, ba Parlimen Sibu, DAP nengah chalun sida, Oscar Ling Chai Yew bulih 26,808 iti undi ngalahka Temenggung Dato Vincent Lau (BN) enggau undi 23,967 iti lalu chalun ngatika diri Narawi Haron semina bulih 203 iti undi.
Ba Parlimen Lanang, Alice Lau menang enggau 26,613 iti undi ngalahka Datuk Tiong Thai King (BN), 17,983 iti undi.