Raban nembiak deka nentuka kuing pemansang menua, bansa dudi hari
MIRI: Raban nembiak deka nentuka kuing pemansang menua enggau bansa dudi hari.
Menteri Muda Orang Indu, Ruang Bilik enggau Pemansang Anak Mit, Rosey Yunus madah nya kebuah perintah kitai ngemeratka belajarka pelajar tumu nyadi palan nembiak mit ulih dikemansang ba tikas tumu dalam semua pekara nyengkaum pelajar, pengawa volunteer sereta mantaika nama ti dikedeka sida ba nengeri enggau menua.
“Kami deka medarebak baru ngaul diri dalam nempa bansa, enggau penyiru lalu peminta raban nembiak ulih gawaka bansa enggau nengeri,” ku Rosey dalam jaku dipansutka rambau Program Kommuniti Perihatin Kanak Kanak Terpimpin diatur Opis Pengintu Pengelantang Miri, di Tim Resort, Kampung Beraya Lama, Lambir kemari.
Sama bisi datai Pemesai Pengintu Pengelantang Miri, Sharifah Halimah Wan Hassim.
Nitih ku Rosey, nyadi raban nembiak ti nyadi pun penentu gaya pemansang di Miri, Subis, Sarawak tauka menua dudi hari, sida meseti disikap sereta nyediaka diri empu ba juluk enggau kuing ti dikedekaka sida.
Ku iya, raban nembiak meseti belajar tumu ba pekara pemar, semangat volunteer di sekula laban bisi sekeda enda meretika gaya orang kemaya hari ti seranta sereta bisi sekeda idup lantang.
Nangkan nya, nempa runding sida ba tikas pelajar tumu dalam mayuh program ti dipejalai sereta ngajar sida maya di luar rumah ba mayuh macham pekara nyengkaum pemar enggau penyamai orang bukai ba pengidup nyata.
“Maya sida diajar senentang pekara tu, nyengkaum penagwa volunteer, sida ulih ngasaika peneleba sereta meda empu pekara nyata ti nyadi ba pengidup rayat di menua tu lalu nemu baka ni mutarka iya,” ku iya.
Rosey ke mega Kaban Kunsil Nengeri ( ADUN) Bekenu madahka maya raban nembiak diberi awak tauka dikaul dalam program ngaul peminta komuniti tauka ke bukai, sida deka meretika pengelantang tauka pemar ditapi raban orang seranta sereta ngenang pekara ti diterima ari apai indai, pengajar enggau perintah ke bisi diatu.
Ku iya, ambika chunto, pengawa volunteer dipejalaika bala pesereta rambau program ngechat rumah di Kampung Mumong, Bekenu ti diempu ruang bilim seranta deka meri sida gaya pengidup nyata ba pengawa pengasih enggau penyiru.
Berebak enggau nya ku iya, perintah mega ngemeratka Transformasyen Nasional 50 (TN50) laban perintah dekaka peminta raban nembiak ulih gawa nempa bansa laban sida deka ngubah nengeri enggau menua jemah.
Kenu ku Rosey, bala ketuai ke diatu ulih macha juluk sida tang nyangka ukai ti dikedeka raban nembiak ke diatu, nya alai perintah dekaka rebak baru mantaika kuing pejalai dudi hari nitihka peneka sida.
Ke bendar, pekara ti dikedeka kami deka meda pengidup kitai ditu, raban nembiak baka kitai ke sehari tu lalu maya nya umur kami udah manggai, ku iya nambah.
Ku iya, raban nembiak meseti nyediaka diri empu ungkup pengidup sida enggau maya kitai tuai ngambika kitai ulih bela begulai ngasaika pemaik ari sida.
Ba lansa isu bukai, ku iya, pekara ti balat nyadi diatu iya nya bepakaika dadah ulih raban nembiak lalu diatu udah ngelekai ngagai tumpuk pendiau enggau rumah panjai.
Kitai udah bejuraika pasal dadah kenyau ari sida (nembiak) ada lalu dulu suba di mengeri besai aja baka di Kuala Lumpur tang diatu di menua pesisir.
Penanggul dadah deka ngelekai ngagai raban nembiak lalu deka ngerusak bansa kitai enggau runding sida nyengkaum pengidup kitai dudi hari deka anchur, ku uya nambah.
Berebak enggau program nya, Rosey mega bisi ngemendarka geran RM2,000 ngagai Palan Aktiviti Nembiak Mit Permyjaya enggau Taman Tunku, Miri.