Karim muji pemutus perintah besai ngelaungka TTx ungkup rayat M’sia
SIBU: Pemutus madahka peranak menua Malaysia dikelaungka enda mayar chukai dagang temuai (TTx) sebengkah ari berita ke manah ngagai rayat menua tu.
Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah madah, baru empai lama chukai Barang enggau Servis (GST) udah digaga ditu lalu pengawa ngaga chukai dagang temuai nya endang ukai berita ke manah didinga.
“Nya alai, kitai gaga amat ati lalu beterima kasih ngagai perintah besai laban pemutus nya mandangka perintah semampai ngemeratka pengidup rayat ditu,” pia ku iya maya berandau enggau pengarang berita.
Kena hari Tiga minggu seiti tadi, Menteri Dagang Temuai enggau Main Asal Datuk Seri Mohamed Nazri Abdul Aziz madahka rayat Malaysia enda dipinta mayar chukai nya enti udah dipejalaika ila.
Iya madah, chukai nya ila semina deka dibayar temuai ari menua bukai ke diau ba semua bansa premis alai diau enggau bayar RM10 seiti bilik semalam.
Nambahka nya, iya merambu urung RM211 juta deka diulih ari chukai nya setaun enti nitihka ‘Average Occupancy Rate (AOR).
Ari penyampau asil nya, iya nya RM10 seiti bilik semalam, Rm1 deka dipulaika baru ngagai nengeri-nengeri ngambika dikena nyaup ngemansangka agi sektor dagang temuai sida.
Ba pekara ti bekaul, Chairman Gerempung Hotel Zon Tengah, Johnny Wong madah, udah berandau enggau bala raban gerempung, sida meda berita nya manah laban semina temuai ari menua luar aja dipinta mayar chukai.
Chukai dagang temuai nya dikemendarka Parlimen pun taun tu tadi lalu udah ditetapka deka berengkah bukan tu tang dilanjar baru nyentuk 1 Ogos.