Gaga pengawa betanam betupi nyadi dagang
Jamit meransang raban orang bumai berundingka pekara tu dikena nyungkak pengidup sida
KAPIT: Kaban Kunsil Nengeri ( ADUN) Bukit Goram, Jefferson Jamit Unyat meransang raban orang bumai di Kapit berundingka pengawa betanam betupi tu nyadi dagang.
“Kereja memanah pengawa betanam betupi. Perundingka pengawa betanam betupi tu nyadi dagang ti ulih mansutka penatai pemisi ti manah. Berunding panjai baka ni deka ngadu betanam betupi nyadi dagang besai ari utai tanam komoditi baka lada enggau getah, nupi ikan dalam sangkar sereta betanamka sayur,” ku Jamit.
“Ngagai raban pekebun mit, kemayuhka pengawa betanam betupi baka nupi jelu (jani), nginang itit enggau manuk, hortikultur (nanam sayur) enggau buah baka nanas, limau, pisang, rungan enggau ke bukai ngambika dibekal ngagai makit di menua tu.
“Tu dikena nyeliahka pengerugi laban rega komoditi seruran nurun niki bepanggai ba bekal enggau peminta,” ku iya lebuh bejadika Pengerami Malam Negutka Kaul Gerempung Orang Bumai (PPK) Kapit 2017 diatur ba sebengkah palan makai ditu, apin lama ke udah.
Iya minta komiti PPK ngatur workshop kena meri penemu senentang pengawa belada enggau perambu ti patut dikereja berengkah ari diatu dataika taun 2020, pengawa betanam betupi pemadu engkeman sereta bisi untung di Kapit.
“Belaluka peranak menua pesisir kitai sereta pengawa betanam betupi ti dikemeran. Diatu betanam ngaul diri sebilik nanam sayur enggau buah baka rian, dabai, langsat ungkup makit menua tu. Penatai pemisi tu dikena melanja ruang bilik,” ku Jamit.
Ambika chunto, di Kapit tebilang enggau dabai, tanah ditu engkeman endur nanam dabai ngambika dijual, bisi rega manah dalam makit.
Iya nerangka baka ni dunya napi penanggul ba pemakai, peminta ngelui ari bekal ti ngujungka rega pemakai niki sepanjai taun.
Ku iya, nengeri melanja bebiliun ringgit dikena import pemakai baka buah, sayur enggau berau nangkup peminta peranak.
“Dunya betapi enggau penanggul ba pemakai ngujungka rega niki ngenyit. Kitai bisi mayuh tanah. Skim Tunoh di ulu Baleh enggau skim Parit enggau Entali Ai (DID) Nanga Merit ba tanah ti manah endur betanam. Nyema iya dikemansang memanah tau nyadi ‘periuk asi’ ngagai Sarawak,” ku iya nerang.
Jamit minta revolusyen betanam ngaul chara moden bekenaka injin enggau sum. Pengawa ngaji orang gawa dulu suba udah nadai agi, pengawa betanam betupi moden diatu bepanggai ba injin.
Ku iya, perintah diatu ngemeratka pemansang menua pesisir enggau ngenyampatka penyikap perengka guna pemun enggau infrastruktur. Opis Menteri Pemansang Menua Pesisir enggau Kandang Menua sereta Program Transformasyen Menua Pesisir (RTP) nyadika chunto perintah diatu ngemeratka sambung dikena ngaul rumah panjai di menua pesisir.
“Sambung jalai deka ngemai pengelantang ba sukut perengka pengangkut, pengempu tanah patut ngena peluang tu berimbaka tanah sida ngambika bisi rega. Ejensi bekaul baka Komiti Lada Malaysia, Piak Bekuasa Pemansang enggau Pemansik Getah (RESIDA), Opis Betanam Betupi sereta ke bukai, enggau mayuh bengkah skim betanam betupi enggau bantu dikena mantu raban orang bumai ngereja tanah sida.
“Ambika chunto, nanam baru pun getah tiru, lada enggau ke bukai. Kena peluang perengka guna ke bisi dikena ngemansang pengawa betanam betupi ngulihka penatai pemisi,” ku Jamit bejaku ba mua 200 iku kaban PPK ke bisi datai ngulu pengawa sehari nya.
Sama bisi bejaku, Chairman PPK Joseph Jinggut enggau Penulung Direktor Opis Betanam Betupi Kapit Badin Unor.
Sekeda bala bisi datai Menijar Besai Opis Dagang Betanam Betupi Perintah Besai (FAMA) Kapit ErongTeli, Pemesai Pengatur Pengawa Opis Residen Kapit Rolyn Terrance Janting sereta bala ke bukai.
Kereja memanah pengawa betanam betupi. Perundingka pengawa betanam betupi tu nyadi dagang ti ulih mansutka penatai pemisi ti manah. Berunding panjai baka ni deka ngadu betanam betupi nyadi dagang besai ari utai tanam komoditi baka lada enggau getah, nupi ikan dalam sangkar sereta betanamka sayur. Jefferson Jamit Unyat ADUN Bukit Goram