Menua Teluk Brunei di Limbang bisi penau nyadi produk dagang temuai
LIMBANG: Menua bebukit, bisi sungai enggau tasik di Teluk Brunei, Limbang sereta Lawas nyadi palan dagang temuai ti mayuh dipilih nyema dikelaku nyadi produk dagang temuai begulai enggau raban pengemeran dagang temuai Brunei enggau Sabah.
Sapit Kepala Menteri ke mega Menteri Industri enggau Pemansang Pengawa Dagang, Datuk Amar Awang Tengah Ali Hasan mansutka pekara tu rambau bejadika Pesta Limbang di Limbang Golden Jubilee Waterfront, ensanus.
“Kitai ngembuan rampa menua bukit ti manah, sungai, bakau, enggau Teluk Brunei ti nyadi pakej pemadu manah ungkup dagang temuai,” ku iya.
Ku iya, taja tanah kerapa nyadi produk pematak dagang temuai ngagai raban ari luar seraya pengaya ba pengeraja asal, pemakai asal enggau produk peranak asal ngagai pelilih Lawas enggau Limbang ti dikumbai nyadi garis entara menua Utara Sarawak.
Awang Tengah, ti ngarika Kepala Menteri, Datuk Amar Abang Johari Tun Openg, rambau pengerami nya, madahka perintah nengeri udah bejalaika sekeda inisiatif ba pemansang infrastruktur di Limbang dikena ngepunka pemansang bekaul enggau dagang temuai.
Ku iya, kerejasama enggau penyerakup nyadi pun pekara penyulut baka Pesta Lawas, Pesta Limbang, Pesta Irau Aco sereta pengerami ke bukai di Bagi Menua Limbang ngelama tu, taja rayat iya datai ari pupu bansa enggau jalai pengarap.
“Penyelai ba pengelain tu nyadi pengering kitai, taja menua kitai jauh adap Utara Sarawak, kitai ngembuan pemanah rampa menua, main asal, pemakai asal ti nyelai sereta menua strategi dalam BIMP-EAGA, besepiak enggau menua Brunei, Indonesia enggau Sabah,” ku iya.
Awang Tengah, ke mega Menteri Pemansang Mengeri Enggau Pengeraja Asal Kedua, madahka perintah nengeri deka bejalaika pansik holistik, komprehensif enggau inklusif ba pekara langkar perambu enggau peranak menua Limbang.
Kepala Menteri udah ngemendarka pengawa ngemanahka sambung jalai Ting Bukit Buda enggau tebing sungai Limbang, dipunka enggau ngemendarka perambu Jalai Besai Pan Borneo sereta projek hematan kedua Sungai Limbang ti dikemendarka ketuai sebedau tu, niang Datuk Patinggi Adenan Satem.
Ku iya, pekara ti dikemerat iya nya bejalaika muka mayuh agi menua enggau Otoriti Pemansang Tanah Tinggi ari baruh RECODA, dikena ngenegap sereta semua kandang menua tanah tinggi ti manah dikemansang.
“Pemansang tanah tinggi dalam pengasingan ( dikelaung) enda deka mujur, iya patut tegap ( bersepadu), kelebih agi ba sektor dagang temuai sereta kerejasama enggau Brunei enggau Sabah maya infrastruktur besai udah bisi, enggau kaul pakej ngelaku ba pangka ti besai,” ku iya.
Tu meseti deka disikap ngena kotej, rumah endur bemalam sereta komponen ke bukai dalam industri, meransang ekonomi peranak menua tu.
Iya ngansak rayat terus beserakup, progresif sereta ngetanka pengelantang kena nanggam teguh kaul sida.
Iya udah nya nyuaka geran RM50,000 ari Kaban Parlimen (MP) Limbang, Hasbi Habibolah ngagai komiti pengatur ungkup belanja festival nya.
Dulu agi ari nya, chairman pengatur ke lalu nyadi Residen Limbang, Datuk Maria Hasman dalam jaku dipansutka iya madahka Pesta Limbang mega nyadi produk ungkup Utara Sarawak, peengintu pengelantang enggau sektor servis meransang ekonomi peranak menua nya.
Pengerami dua taun sekali kenyau ari taun 2009, begintir atur enggau Pesta Lawas, ba pengawa ngatur aktiviti Gala lumba ai enggau darat adap Utara Sarawak.