Pengawa nyengulaka anak ukai muntang, begunaka pengeransing

SRI AMAN: Pengawa meri pelajar menyana ngagai bala anak ukai pekara ti muntang dikereja tang begunaka pengeransing ati apai indai.

Penulung Kompeni Komander, Pasukan Gerakan Am (PGA) Sri Aman, Inspektor Basri Dahlan nerang, keterubah iya endang tusah apai indai nyengulaka bala anak tang asil iya deka dipeda maya anak sida teulihka pemujur dudi hari.

“Kitai beguna belanja ke mayuh, tulang diri enggau ke bukai laban deka meri pelajar menyana ngagai bala anak, tang kitai deka bulih asil iya dudi hari ila.

“Enda ngawa kitai tusah dulu laban kitai deka bulih asil iya dudi hari. Bala anak tu baka sawit, iya meseti disum, dibantun enggau dijaga me- manah,” ku iya nerang.

Iya mansutka jaku tu lebuhka bejaku bejadi nutup Program Hari Pengelandik Nembiak Mit Tabika Opis Pemansang Mensia Mayuh (KEMAS) Sri Aman bepalan di Palan PGA, Kem Temudok, semak Sri Aman, pagi ensanus.

Ku iya, apai indai mega enda patut ngumbai pengawa meri pelajar tu pekara ti nating sida tang perundingka bala anak tu reta ungkup pengidup dudi hari.

“Kitai ngarapka apai indai ngambi muai runding ke bansa nya lalu patut ngembuan runding panjai ngemansangka bala anak sida nyadi orang ti menyana sereta gawaka menua tu,” ku iya nampung.

Ba lansa ke bukai, iya mega meransang apai indai seruran gawa begulai sereta bekerejasama enggau piak Tabika KEMAS ungkup pemansang pelajar renggat pelajar tumu nembiak mit.

“Randau apai indai begulai enggau pengajar mega patut diatur suah agi ngambika sida seruran nemu tikas pelajar bala anak diri,” ku Basri nampung baru.

Sama bisi datai Pemesai KEMAS Sri Aman Josipah Sabas, Penyelia Kanan KEMAS Sri Aman Fatimah Tahir sereta bala pengajar Tabika KEMAS Sri Aman enggau apai indai ke bukai.

Bisi 120 iku nembiak mit Tabika KEMAS di Sri Aman nyereta sekeda atur program baka Pekit Futsal, Bola Jaring, Rounders, Formula One enggau Gerak Kreatif nyerumba program nya.