Peranak Saratok dipinta ngetanka penyerakup nitihka konsep 1Malaysia
SARATOK: Komuniti di Parlimen Saratok patut terus ngetanka pemanah enggau penyerakup ti mandangka konsep 1Malaysia (1M) udah lama diterenak dalam ati peranak di sitak nya.
Kaban Parlimen ( MP) Saratok, Tan Sri William Mawan Ikom madahka, pengelikun enggau penyerakup entara komuniti seruran bisi dipeda.
“Bansa China, Melayu enggau Iban ulih duduk semija di pak kupi sereta ba sebarang aktiviti enggau pengerami ke diatur.
“Seiti agi chunto nyengala dipeda ti ngayanka penyerakup seruran dikemeran ditu iya nya semua bansa bela ngasai sereta ngintu hari besai ti diatur begulai.
“Bekunsi balai, kunsi mija enggau bekerejasama ngatur aktiviti, endang udah dikemeran komuniti kitai ditu lalu deka seruran ditan laban tu nyadi pemun penegut ngagai semua pekara,” ku iya.
Mawan mansutka jaku nya rambau bejadika Pengerami Nutup Gawai Raya 2017 diatur Raban Ketuai Komuniti Saratok di Balai Sekula Primari Bansa (SJK) Min Syn, semak ditu, malam kilah ensana.
Pengerami udah digulu urung 1,800 iku ari sitak Parlimen Saratok.
Nitih ku Mawan, rayat pupu bansa diingat ngetanka penyerakup ti udah diasaika sehari tu ngambi pulaika pengelantang ngagai menua dudi hari.
“Rayat patut ngetanka nya laban pemuntan sida negika pekara tu deka mai penusah ngagai menua.
“Rayat patut sedar semina nengah penyerakup aja pemansang menua deka seruran bisi.
“Jaku lalau tu ukai semina dituju ngagai raban nembiak rebak baru aja tang mega semua serak komuniti. Kitai dekaka rayat terus begempung ba semua pengawa. Anang sesekali ngenyaika nama menua semina ketegal penyarut enggau pangan diri,” ku iya.
Ku Mawan, pemanah kaul entara komuniti beguna endar nempa gaya politik ti tegap enggau lantang.
Ku iya, tu nentuka bala ketuai perintah ngemeratka semua perati sida, pengawa enggau penemu diri, chakah agi ngemansangka ekonomi rama nengeri tu ngambika ulih ngagai tikas ti ngemegahka ati.
“Pekara pemadu beguna, iya nya kitai meseti terus begempung sereta nyingkang mansang ke mua nyadi seiti tim ke tegap. Nya alai, semua piak patut besaup ngetanka pengelikun enggau pengelantang ti diasai ngelama tu ngambika enda dikeruga ari luar,” ku Mawan nandu nyemetak.
Sama bisi datai Chairman Kaunsil Penyanding Penemu Serakup Islam Malaysia Tengku Azril Abdul Razak, Pemesai Pelilih Saratok Mohd Ikmal Abdullah sereta bala ketuai komuniti ke bukai.