Anang enda nganjung jelu tupi betuchuk vaksin anti-Rabies
SRI AMAN: Komuniti di kandang menua tu ti bisi jelu tupi baka ukui tauka mayau dipinta nganjung jelu tupi sida betuchuk vaksin dikena nyeliah kena rampit virus Rabies ti naka ke diatu udah munuh lima iku peranak nengeri tu.
Menteri Muda Pengelantang Komuniti Sarawak Datuk Francis Harden Hollis madah, tetiap komuniti ditu patut besedia napi sebarang penanggul ti bekaul enggau penyakit Rabies.
Berindik ari nya, sebedau penyakit tu ngelekai kitu, tetiap rayat patut besedia napi sebarang penanggul lalu patut nuchuk vaksin ngagai jelu tupi sida baka ukui enggau mayau enggau lengkas.
Iya ke mega Kaban Kunsil Nengeri (ADUN) Simanggang madah munyi nya lebuh ti bejaku ba Program Licha Rabies ke udah diatur 14 buah Komiti Pemansang enggau Pengelikun Genturung Pendiau (JKKK) Kandang Menua China Sri Aman ti bepalan ba sebuah hotel ditu kilah ensana.
Ku iya, naka ke diatu semina di Puggu Mawang, Sri Aman aja udah ditukuka bisi positif Rabies kenyau ari 18 Julai tu tadi.
“Genturung pendiau ke dalam kandang 10 kilometer radius ari Punggu Mawang iya nya ari Selepong nyentuk ke Rapak, udah nya ari Lachau nyentuk ke Selanjan.
“Semua kandang menua nya udah ditaka bisi positif Rabies berindik ari dua kes nya ti bisi nyadi ba Punggu Mawang,” ku iya.
Beserimbai enggau nya, Harden ngelalau komuniti ke bisi nginang ukui sereta mayau ngambika ngurung jelu tupi sida ngambi nyeliahka kena rampit virus nya.
“Virus Rabies tu ngerampit nengah telih bekau kena gigit, telih ti nyadi ba kulit ti bisi kena liur tauka sel tubuh ari jelu ke udah bisi virus nya,” ku iya nandu.
Sama bisi maya nya Dr Musalnizam Mustalkah ari Sepital Sri Aman, Pemesai Opis Betanam Betupi Sri Aman Chana Langkam sereta ke bukai.
Dulu agi ari nya, bisi pengawa meri licha ke udah digaga Dr Musalnizam Mustalkah, Chana Langkan sereta Bong Ting Ting ke meri licha dalam Jaku China.