Ukui enda tau enda dituchuk vaksin dikena nyeliahka pengelekai penyakit rabies
BAU: Dikena nentu Mengeri Kuching enda dikeruga sakit rabies, 70 nyentuk 80 peratus ari semua penyampau ukui mesti dituchuk ngena vaksin rabies.
Pemesai Penyendia Servis Veterinar Sarawak, Dr. Nicholas Jenek madahka semina nengah chara nya aja sakit rabies ulih ditagang lalu enda ngelekai.
“Isu ke diatu iya nya kitai enda nemu berapa penyampau ukui di Mengeri Kuching lalu kitai meseti nentuka ukui tu dituchuk vaksin.
“Ukui ke udah dituchuk vaksin enda ngerampit ke penyakit rabies ngagai mensia mayuh,”ku iya lebuh dikerandau ba Palan Operasyen Vaksin Ngintu Rabies ke diatur di Dewan Suarah Bau kemari.
Iya nambah, ukui ke udah dituchuk enda tau enda dikurung dalam timpuh 28 hari ngambika vaksin nya semitan amat ba tubuh jelu nya.
“Pemadu jampat pan pengudah 14 hari, iya nya ngambika ukui ke dituchuk bisi antibodi.
“Enti kurang ari timpuh nya, kitai enda nyamin vaksin nya semitan,” ku iya nambah.
Ba pengawa kemari, bisi enam tim ari Opis Penyendia Servis Veterinar Sarawak ngadu program nuchuk vaksin ke alai sida nagit ulih nuchuk urung 3,000 iku ukui.
Nitihka penerang ari Dr Nicholas, opis perintah nya deka nerima vaksin agi sehari tu (kemari) ungkup pengawa nuchuk urung 16,000 iku agi ukui.
Iya madah program nya deka majak dipejalai nyentuk ke ngagai kandang mengeri Kuching, Serian, Bau, Sri Aman sereta ke bukai nadai agi napi keruga sakit rabies.
“Kitai deka nyeliah mensia mayuh ari dirampit penyakit rabies baka ke udah nyadi dulu agi ari tu,”ku iya.