S’wak deka nerima 50,000 vaksin rabies ari Bangkok
Dikena nentuka semua jelu tupi nerima tuchuk vaksin nya lalu dikena nagai penyakit rabies ari ngelekai: Shabery
BAU: Sarawak deka nerima 50,000 vaksin penyakit rabies ke udah dibeli ari Gerempung Pengerai Jelu di Bangkok dikena nentuka semua jelu tupi nerima tuchuk vaksin nya, ku Menteri Betanam Betupi enggau Industri Bepelasarka Pengawa Betanam Betupi Dato Sri Ahmad Shabery Chek.
Iya mega muji pengawa perintah nengeri mutarka keruga sakit rabies .
Ku iya, pengelengkas atur ke dipejalai Komiti Mutar Penusah Ngenyit Nengeri (JPBN) Sarawak ti udah meri kelai zon likun rabies mujur nyeliah penyakit nya ngelekai ngagai pelilih bukai.
Tajapia ku iya, kitai enda ulih madah penyakit ke ngelekai kenyau ari bulan Jun tu tadi udah mujur diputar.
“Bepelasarka ripot ke diterima, semua sampel ukui ke diuji meri asil negatif sakit rabies.
“Kitai mega nadai nerima kes baru sentang orang ti bisi kelai sakit rabies dalam kandang berapa minggu ke udah,” ku iya.
Shabery mansutka jaku nya ba aum pengarang berita pengudah ngelawa ngagai Palan Operasyen Vaksin Nyeliah Rabies ke diatur di Dewan Suarah Bau kemari.
Ngenang kaul ke sama, iya madah perintah nengeri nengah Opis Penyendia Servis Veterinar Sarawak deka majakka pengawa mutar keruga
Kitai mega nadai nerima kes baru sentang orang ti bisi kelai sakit rabies dalam kandang berapa minggu ke udah. Dato Sri Ahmad Shabery Chek Menteri Betanam Betupi enggau Industri Bepelasarka Pengawa Betanam
sakit rabies.
Iya madah raban pengereja pengawa deka ditambah lalu program betuchuk vaksin deka majak diadu.
“Kitai udah nganjung 10 pengereja pengawa ari Opis Penyendia Servis Veterinar ari Semenanjung ke Sarawak lalu deka ditambah dudi ila.
“Sepenyampau 47,000 vaksin udah dianjung ke Sarawak ke alai ari penyampau nya 23,000 udah dikena,”ku iya.
Program kemari nagit meri tuchuk ngagai 3,000 iku ukui ngelingi Bau.
Bela nyempulang penemuai kemari, Sapit Kepala Menteri ke mega Chairman JPBN Sarawak Datuk Amar Douglas Uggah,Kaban Parlimen Mas Gading Dato Anthony Nogeh enggau pemesai bukai.