Sekula nyadi palan endur ngiri penemu, pengelandik
Apai indai patut ngemeratka pelajar bala anak dikena besemekih dalam dunya pemansang: Nanta
KAPIT: Sekula iya nya pelasar dikena nyeridi penemu ngagai nembiak. Bala apai indai patut ngemeratka pelajar anak sida berengkah ari diatu, pia ku jaku Sapit Menteri Pemansang Menua Pesisir Enggau Kandang Menua Datuk Alexander Nanta Linggi rambau atur Program Pemesai Begulai Enggau Rayat ti bepalan di Balai Mayuh Guna Sekula Primari (SK) Lepong Baleh, ditu bedau lama.
“Sekula nyadi pelasar ngiri penemu enggau pengelandik. Aku minta apai indai ngemeratka pelajar bala anak.
“Pengajar tu raban pelajar profesional. Sida naka ulih nyeridi nembiak. Apai indai meseti ngemeratka sekula anak. Bandingka penyulut anak orang diau besemak dalam pelajar dikena meransang anak sida empu.
“Apai indai meseti nemu nama tuju nganjung anak sida besekula. Aku ngapil ngagai kepala pengajar enggau pengajar ngambika bebendar agi nyeridi bala nembiak kena nangkup juluk apai indai sida.
“Kitai deka nemu berapa pemayuh enggau bulih semua A lalu baka ni deka nampung pelajar di universiti tauka palan pematih pengelandik. Pelajar tu pengawa seumur idup. Pelajar tambah, bansa mansang lalu bansa deka lantang senang,” ku Nanta nerang.
Tu kedua kali penemuai Nanta ngagai SK Lepong Baleh dalam taun taun lalu Nanta udah mantaika pengandal diri meda mayuh ubah pemansang di sekula nya kenyau ari penemuai iya ti keterubah.
“Aku mega bisi meda penyikap perengka guna pemun sekula tu bisi manah agi.
“Penerang ke diterima aku, iya nya sekula tu udah nyulut agi dalam peresa UPSR 2016 sereta aktiviti kurikulum ba renggat nengeri baka pantun sereta bisi penau merindang – belagu. Dudi hari ila, bala nembiak kitai meseti pintar runding, bepenemu sereta nyadi orang gawa bepengelandik ngambika ulih besemekih enggau bala bukai ari kandang mengeri,” ku Nanta.
Program sehari nya ke
Sekula nyadi pelasar ngiri penemu enggau pengelandik. Aku minta apai indai ngemeratka pelajar bala anak. Datuk Alexander Nanta Linggi Sapit Menteri Pemansang Menua Pesisir Enggau Kandang Menua
diatur Gerempung Apai Indai enggau Pengajar (PIBG) SK Lepong Baleh dikena nyikap nembiak Primari Enam ti deka napi peresa UPSR enda lama da agi.
Fasilitator iya nya pengajar ti bepeneleba ngenataika licha ba subjek pemun baka Jaku English, Jaku Malaysia, Sains enggau Matematik. Tuju nya dikena meransang nembiak nyediaka diri napi peresa UPSR nentuka sida teulihka pemutus peresa ti manah.
Ku Nanta, seminar tu disedia ngagai UPSR ulih raban PIBG sereta staf sekula. Bela bisi diatur randau enggau licha peransang ngagai apai indai enggau nembiak laban sekula tu mega – SK Lepong Baleh, udah dikelala seiti ari sepuluh sekula di serata Sarawak ungkup program diberi nama Sekula Transformasyen 2025 (TS25), reti nya, program kena mantu sekula nyapai penyulut sereta nyadi chunto sekula bukai.
Ku iya, pengawa milih sekula belalauka mayuh bengkah sukut pekara. Sekeda ari nya, ngajar (pengajar) enggau staf sekula ti mandangka diri ulih nerima nentuka pemujur program TS25 lalu bisi seratus buah sekula di serata menua udah dipilih.
“SK Lepong Baleh diperatika sekula ti besai. Penyampau tubuh nembiak manggai 396 iku, 34 iku pengajar enggau 13 iku staf. Urung setengah ari nembiak berundang ari rumah besemak seraya ke bukai diau bemalam di sekula.
“Naka diatu, sekula semina suntuk ba pekara fizikal aja tang sida endang begunaka mayuh agi kelas, makmal sains dikena nangkup penambah tubuh nembiak,” ku Nanta.
Kebuah tubuh nembiak majak nambah ku Nanta, laban menua tu tengah-tengah sereta kandang sekula strategi lalu mayuh peranak menua pesisir Baleh mindah ngagai Kapit. Tang semua sekula primari di Kapit sekut, ke alai sida (apai indai) nadai sanggu nganjung anak sida besekula ditu, sekeda kilometer aja penyauh enggau sambung jalai ti manah ngagai Kapit.
“Nyata endar sekula tu ulih dikemansang ngagai sebuah sekula ti manah agi berindik ari TS25 tu. Iya ukai ba tengah mengeri. Iya enda entu jauh enggau sambung jalai ti manah. Program tu ngemeratka licha peransang ngaul apai indai, pengajar enggau nembiak nyediaka diri sida nyadi sekula ti menyana agi,” ku Nanta.
“Apai indai patut temegah ati sekula tu nyadi seiti ari sepuluh buah sekula di nengeri udah dipilih ungkup TS25. Sekula tu bisi penau, nya alai aku ngansak apai indai meri kerejasama ngagai piak sekula kelebih agi Kepala Pengajar, Malang Biat enggau bala staf nentuka pemujur TS25.
“Nuju semua staf, aku minta kita terus gawa memanah ngagai sekula, ba pekara sekula tu udah dipilih ngambika nyadi sekula manah agi. Ngelama tu, sida udah ngereja pengawa chukup manah lalu sida patut ngemeranka iya laban pengandal dilempaika ba sida ungkup pemujur program TS25.
“Kitai meseti ngempung penemu begulai, apai indai, pengajar, nembiak, opis, komuniti menua tu nentuka program TS25. Aku temegah ati laban tu ungkup Kapit taja kitai dikumbai sekula menua pesisir, kitai ulih mujur. Nyadi pengari rayat, aku deka naka ulih mantu,” ku Nanta.
Dulu agi ari nya, sama bisi bejaku Kepala Pengajar SK Lepong Baleh, Malang Biat enggau Chairman PIBG Akun Ugas.
Malang madahka 100 buah sekula di serata menua dipilih ungkup program TS25.
Ku iya, pun taun tu tadi, iya udah ngagihka RM11,000 ti udah dikena memanah lalu diatu iya ngemendarka RM10,000 da agi dikena masa sida (sekula) ti udah ngena belanja memanah ngatur aktiviti.
Kepala Pengajar SK Lepong Baleh Malang Biat, pemesai ari Opis Pelajar Kapit Sigau Nyantau mangku pengawa ngatur peresa, Kepala Pengajar SK Sungai Amang John Lang, Chairman PIBG SK Lepong Baleh Akun Ugas, Sekretari Politik Kepala Menteri Sarawak Tapah Ata sekeda ari bala ke bisi datai.