Penanggul tanah tusur ke nyadi di Kuala Tutoh deka diputar lengkas
MARUDI: Sapit Speaker Kunsil Nengeri (DUN) ke mega Kaban Kunsil Nengeri (ADUN) Mulu, Dato Gerawat Gala, madahka tuju pejalai iya ngagai Kuala Tutoh begulai enggau sekeda pemesai kanan perintah pagi bedau lama udah ketegal deka ngabas sereta meda semak agi gaya tanah tusur ke nyadi di Kuala Tutoh, kena pagi Hari Minggu ( 23 Julai), urung pukul 3 dinihari.
Iya mansutka madah munyi nya ngabas 77 pintu rumah panjai, ke alai 10 pintu balat rusak ba mua laman rumah panjai nya.
“Pejalai tu mega gaya tanah tusur di tebing sungai Kuala Tutoh lalu kitai nemu pengawa ke patut digaga udah tu. Kitai meda mayuh langkau manuk, stor injin enggau sekeda kebun sayur udah rusak.
“Berindik ari penusah ke nyadi kenyau ari taun 2012, perambu deka ngaga dinding penekat tang bedau bisi kemendar.
“Ke diatu, kitai deka berundingka sekeda chara mutarka penusur tanah ba ruang bilik ti kena laban nya. Bisi bekau merekah ba geladak rumah lalu kitai patut ngaga dinding penekat naka penyampat.
“JKR enggau DID deka gawa begulai mutarka penanggul tu,” ku Gerawat.
Iya bisi mai bala palar ari JKR Miri beratika gaya enggau mutarka penanggul nya. Tanah tusur ba tebing sungai laban rumah panjai tu suah ampuh bah.
“Nya alai aku ngasuh sida ngiga palan ke tinggi agi endur ngentak rumah panjai baru nyema kitai begunaka belanja bejuta ringgit dikena ngaga dinding penekat, manah agi sida ngentak rumah panjai baru.
“Tambah mega rumah panjai tu bedau disikap bekal ai enggau elekterik lalu tu bepanggai ba peranak rumah panjai tu nengah perambu timpuh panjai.”
Laban suba, rumah panjai tu jauh ari sungai Baram, tang diatu nyau majak semak.
Gerawat ngingatka ungkup bantu begunan rusak, sida patut berundingka nya laban tu penusah ngenyit. Perintah enda mayar pampas 100 peratus tang deka ngelempungka tating penusah sida ke tasah.
Berebak enggau nya, Gerawat ngelalau sida ke ngempu bilik ti enda likun endur diau, ngambika diau dulu nyemilik kaban belayan ke bukai.
Gerawat mega meri terima kasih ngagai semua ejensi perintah ti udah gawa sereta mantu penusah nya baka Opis Pelilih, Bomba, Polis, DID, APM enggau opis bekuasa ke bukai.
Pengawa ngaga dinding penekat patut digaga enggau 100 meter pemanjai sereta 10 kaki peninggi, ti begunaka belanja urung RM500,000.
Bela bisi nyempulang Dato Gerawat iya nya Residen Miri Puan Sheriina Hussaini, Pemesai Pelilih Marudi Mackos Sibong, Pengari JKR Sapit Injinir Hepini Kassim, Pemantu Khas Dato Gerawat, Harry Harold sereta APM captain Mohd Hazle Shah.