27 iku nembiak sekula nyereta Pekit Pidato Iban 2017 ti keterubah
KUCHING: Bisi 27 iku nembiak ari sepuluh buah sekula udah ngenukuka diri masuk Pekit Pidato Iban 2017 ti keterubah di nengeri tu, ke deka diatur kena 4 enggau 5 Ogos.
27 iku pesereta tu deka bepekit dalam Kategori Nembiak Sekula.
Bisi mega dua kategori ke bukai iya nya Kategori Pelajar Tinggi (IPT) enggau Kategori Tebuka Baruh 45 taun ke disereta enam iku pelajar IPT sereta tujuh iku ba kategori tebuka.
Nitih ku piak pengatur Utusan Borneo enggau Gerempung Pemansang enggau Pelajar Jaku Iban (UB-Aedil) kilah ensana, semina enam iku pemekit ari tetiap kategori deka masuk ngagai renggat kepenudi iya nya kena 5 Ogos, pukul 8 pagi di auditorium Palan Pematih Pengajar (IPG) Batu Lintang, ditu.
18 iku pesereta deka dipilih nya ila deka besemekih ba renggat keterubah ti diatur di Hotel Kingwood, Jalai Padungan kena 4 Ogos.
Pengawa ngerejista diri ba renggat saringan iya nya deka berengkah ari pukul 1 lemai nyentuk 8 malam (4 Ogos).
Pengudah nya, enam iku pesereta kepenudi ba tetiap kategori deka nyabut undi ba gintir sida bejaku maya renggat kepenudi kena 5 Ogos.
Pekit Pidato Iban 2017 tu nyediaka perais mata duit lalu nadai bayar masuk.
Piak pengatur udah ngangauka Sapit Kepala Menteri Tan SriDrJamesJemutMasingnyadi temuai dipebasa maya pengawa bejadi kena 5 Ogos tu.
Nangkan nya, piak pengatur mega nerima sukung belanja ari Masing (ke mega nyadi patron pekit), Menteri Muda Nembiak enggau Lumba Snowdan Lawan, Kaban Parlimen (MP) Lubok Antu Datuk William Nyallau Badak, MP Ulu Rajang Datuk Wilson Ugak Kumbong enggau MP Sri Aman Dato Masir Kujat sereta sukung khas ari Ranyai Studio enggau See Hua Marketing.
“Raban NGO UB-Aedil volunteer ngatur pekit tu belalauka jaku YB Tan Sri Dr James Masing, keterubah diatur di Malaysia nama ke diatu, pekit bejaku ba mua mayuh dalam jaku Iban. Kitai meransang mensia mayuh masuk pekit tu ngambika sida ulih nyadi sebagi ari kenang jemah ila. Kami ngarapka pesereta deka datai enggau pengingin ati diri sereta ukai ari pejal sebarang piak. Semua tu bepelasarka pengawa volunteer enggau kerejasama ari semua piak deka nentuka pekit tu mujur,” ku Chairman Pengatur Churchill Edward Drem.
“Ketegal pekit tu terubah diatur NGO baka UB-Aedil, kami deka nentuka pekit tu beguna sereta besai reti, kitai melabaka ulih belajar sekeda pekara ari ngatur pengawa tu. Tang ngagai sida ti rinduka Jaku Iban, kami ngena awak ke bisi tu nentuka pekit tu nyadi pelasar nyaup kami (volunteer) ba pengawa ngemansang sereta ngenegapka agi Jaku Iban,” ku iya nambah.
Sekula ke bisi nganjung pengari bepekit iya nya SMK Tun Abdul Razak, SMK BM Saratok, SMK Serian, SMK Engkelili, SMK Simunjan No.1, SMK Song, SMK Pakan, SMK Melugu, SMK Sri Aman enggau SMK St Luke.
Kategori Nembiak Sekula Sekondari ti udah ngenukuka diri masuk pekit ngagai komiti pengatur kemari iya nya Debra Simoi, Joseph Anja Su, Alisia Abagail Dinang, Natasha Anne Lenta Lawrence, Fiona Pudai Christopher, Nia Fiona Lengana Joanes Jeshua, Shearer Ryan Raymond, Petrice Rachel Janang, Meggry Chleo Bunai Daniel, Adlinea Alexander, Jesica Cherenny, Jasmine Lyn, Tracy Layau William Dambol, Daiyanti Juit, Fatanea Endik Ngumbang, Alvis Anggang, Famelia Rolannie Rufie, Rebecca Agnes Yusop, Angelina Miara Jong, Wilfred Denial David, Kimberly Ruby Radin Dandi, Arthur Buyong Aloh, Anderina Miloh Bugie, Sabri Langgai Pelin, Marila Kilat, Bugin Bunyau enggau Dominic Anggit Ansam.
Enam iku pesereta dalam Kategori Pelajar Tinggi iya nya Rynna Sha’erra Mindew, Micheal Bandang Tinggai, Brolin Golayous, Easter Wendy Ngalit Lawrance, Erica Leenya Eben enggau Nicholas Beliang Engkabi.
Tujuh iku pesereta dalam Kategori Tebuka Baruh 45 iya nya Martin Dinil, Tini Numpang, Suda Lunyong, Robin Sila, Bruwin Jumput, Larry Dabong enggau Sangin Juat.
Pekit keterubah tu diatur mega nerima sukung ari sekeda NGO Dayak baka raban Nembiak Gerempung Bansa Dayak Sarawak ( SDNU), Serakup Nembiak Dayak Sarawak (Pebedas) enggau Serakup Dayak Iban Sarawak (Sadia) Kuching.