PPWS pampang Limbang mujur ngatur Pengerami Ngiling Bidai di Rh Sengat

LIMBANG: Penatai lebih 300 iku raban Persekutuan Perkumpulan Wanita Sarawak (PPWS) Pampang Limbang di Rumah Panjai Sengat, Jalai Kubong nyadi pelasar pemadu manah ngenegutka kaul ba rumah panjai di kandang menua pesisir.

Pengerami Ngiling Bidai ti diatur pengujung Gawai nya dirichah enggau penatai Ketuai Kunsil Opis Pelilih Menua Limbang Kunsilor Sufian Mohat enggau 49 Pampang PPWS di Pelilih Limbang.

Program tu diatur enggau ngempung semilan PPWS rumah panjai di pelilih menua tu.

Sama bisi datai pengatur PPWS Sitak Limbang enggau Lawas Nurul Izza Hanis, Chairman PPWS Pelilih Limbang Dayang Suridah Mohamad Superi enggau Chairman PPWS Pampang Rumah Sengat Rosita Landun.

Sufian madahka pengawa ngabang ngagai rumah panjai diatur PPWS mai reti ngambi ngetanka runding ti ulih bebatak asur enggau pangan diri. Penyerakup enggau pengelantang rayat di menua tu endang udah lama dikemeran kelebih agi dikena ngerichahka pengerami Gawai ninting taun.

Iya andal amat PPWS Pelilih Limbang deka mansang ba pengawa ngangkatka pengawa sida ke indu mansang ba mayuh macham bidang.

Dayang Suridah madahka pengawa ngatur pengerami nya beguna endar dikena nanggam pemanah kaul entara raban indu di mengeri enggau menua pesisir.

“Kitai deka nempa kaul ti rat kelimpah nentuka pro- gram enggau aktiviti tetiap pampang ulih dipejalai enggau mujur.

Limbang bisi 49 Pampang PPWS ngaul 1,232 iku kaban datai ari semilan buah rumah panjai, dua pampang Bisaya lalu seiti pampang Sakura tebal agi bansa China.

TERIMA KASIH: Rosita (kiba) nyuaka tepa ngagai Sufian, dikemata Nurul Izza (dua kiba) enggau Dayang Suridah (kanan).

NANGGAM KAUL: Nurul Izza (depan kiba), Rosita, Sufian enggau Dayang Suridah begambar begulai enggau bala kaban PPWS Pampang Limbang di Rumah Sengat.