Perintah patut mantu ngemanahka LTB: Uggah
Nengah pemisi padang bilun tu deka nyungkak makit dagang sereta ngangkatka ekonomi di Bario
BARIO: Sapit Kepala Menteri Datuk Amar Douglas Unggah Embas nyukung perambau Kaban Kunsil Nengeri ( ADUN) Mulu Datuk Gerawat Gala ngansak perintah ngemanah Padang Bilun Bario (LTB)
Ku iya, LTB ulih nyadi jalai dikena nyungkak makit dagang entara kandang menua tanah tinggi enggau kandang menua bukai sereta mega dunya.
“Bario ngembuan bemacham produk ti ulih dijual ba makit lalu enggau pengawa ngemanahka LTB ila, produk tu ulih dijual ba mengeri besai sereta dieksport ke menua luar.
“Aku ngarapka Kepala Menteri Datuk Amar Abang Johari Tun Openg deka berundingka peminta tu ngambika diperati,” ku iya dalam bejaku bejadika Pesta Nukenen 2017 ditu, bedau lama ke udah.
Sama bisi datai Menteri di Opis Kepala Menteri Datuk Talib Zulpilip, Menteri Bekal Ai enggau Elekterik Menua Pesisir Dato Sri Dr Stephen Rundi Utom, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali, enggau Datuk Bandar Miri Adam Yii.
Ba pekara bukai, Uggah mega ngemendarka Bario dipasuk ke dalam seiti ari bagi menua ti deka dikemansang Ejensi Pemansang Tanah Tinggi (HDA) Sarawak nengah Komiti Kaunsil Pemansang Koridor Wilayah (RECODA).
“Nengah HDA tu ila, kitai ulih ngenyemakka ser- akah pemansang entara kandang menua pesisir enggau mengeri.
“Bala kaban dalam HDA tu diketuaika aku empu enggau sekeda ADUN sereta Kaban Parlimen ( MP) ti deka duduk sama beratika perambu pemansang ti patut dibai ngagai kandang menua tu ila,” ku iya.
Ku Uggah, Bario bisi mayuh menua ti tau dikemansang baka palan nanam berau Bario sereta sekeda palan industri komoditi ke bukai.
“Pengudah HDA dipejalai, ejensi tu ulih matak mayuh agi temuai ngagai menua tu lalu aktiviti dagang temuai deka richah agi sereta mansang di Bario jemah.
“Perintah andalka RECODA ulih mantu bejalaika ak- tiviti pemansang di kandang tanah tinggi ila pengudah pemujur sida ngemansangka sekeda projek pemansang di Sarawak sebedau tu.
Ba lansa ke bukai, Gerawat dalam jaku dipansutka iya madahka sukung rat komu- niti ditu ba pengawa perintah ngemansangka kandang tanah tinggi enggau penumbuh HDA.
“Nengah HDA tu ila, dikearap sistem perengka pengangkut langit ditu ulih dikemanah ngambika LTB ulih nampung penyangkai bilun ATR kelimpah Twin Otter ti dikena diatu.
“Enggau pengawa ngemanahka LTB ila, ulih mai mayuh agi temuai kitu lalu sida empu ulih ngasaika pemanah rampa kandang menua tanah tinggi Bario enggau main asal ke bisi ditu,” ku iya.
Berebak enggau nya, Uggah udah madahka pemeri ngagai Serakup Rurum Kelabit penyampau RM70,000 iya nya ti nyangkaum pemeri ari iya empu (RM35,000), Talib (RM10,000), Stephen Rundi (RM10,000), Gerawat (RM10,000) enggau Sharifah Hasidah (RM5,000).
Bela bisi dikemendar iya nya pemeri penyampau RM400,000 ungkup projek ngemanahka dua buah gerija di Bario.
Bario ngembuan bemacham produk ti ulih dijual ba makit lalu enggau pengawa ngemanahka LTB ila, produk tu ulih dijual ba mengeri besai sereta dieksport ke menua luar. Datuk Amar Douglas Unggah Embas Sapit Kepala Menteri