DOPPA ngapil perintah nengeri mutarka isu NCR ti ditanam sawit
MIRI: Raban Gerempung Orang Bekebun Sawit Dayak ( DOPPA) ngapil ngagai perintah nengeri senentang isu pala tanah ba tanah adat bansa asal (NCR) ti ditanam sawit lalu mutarka isu berat ti ditapi pekebun mit di nengeri tu.
Sekretari DOPPA Incham Serdin, madahka pekara ngambi orang gawa ari menua luar enggau isu berat ke bukai udah dibantaika ngagai Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua, Pemansang Kandang Menua enggau Tanah Asal Datuk Amar Douglas Uggah Embas rambau pejalai nemuai meri basa ngagai opis iya, bedau lama ke udah.
“Kaban komiti mantaika peminta sida ngagai perintah ngambi ngeluarka surat pala tanah ba tanah ti udah ditanam sawit, bejalaika pengawa natak rega FFB dikena mutarka penanggul serantau sereta penanggul berat bukai ti ditapi pekebun mit,” ku iya.
Ku iya, sapit kepala menteri mega nerima manah isu ti dibantaika sida rambau penemuai nya ti diuluka Presiden DOPPA Dr Richard Mani Banda kena 25 Julai.
Penemuai tu nyadi seiti ari chara DOPPA bekerejasama enggau perintah nyungkak penatai pemisi pekebun mit sawit sereta nyadi pemansut ekonomi menua pesisir di nengeri tu.
Kaban komiti mega ngena awak nya mantaika sekeda isu berat ti ditapi pekebun mit sawit kelebih agi sida ti nanam sawit ba tanah NCR.
Permit Dikemendar (AP) ngambi orang gawa menua luar nyangka nyadi isu pemadu berat ditapi laban penanggul suntuk orang gawa ti ngasuh pekebun mit tusut runding, nya alai DOPPA nerima manah pengawa perintah ngemendarka peminta AP ngagai orang ti ngempu NCR.
Bala kaban mega dilalau nganjung peminta AP disempulang enggau status tanah NCR sida ti udah dituku.
Ngelansa pasal bida rega FFB entara serantau, DOPPA ngansak perintah bejalaika pengawa natak rega ngambi ngurangka bida ti ngasuh pekebun mit di Wilayah Tengah seruran irau.
“Rega FFB di kilang enggau rega ti dibayar urung 25 peratus mudah agi ari Wilayah Utara,” ku iya.
DOPPA mega ngenataika berita manah ngagai sapit kepala menteri ke alai ladang cluster enggau jalai tama meruan ari baruh intu Malaysian Roads Records Information System (MARRIS).
Gerempung nya udah ngelakuka aktiviti ngelawa komuniti pekebun sawit, program ‘Aram Besawit’ di Sarawak pengudah pemujur dijapai di Selangau dalam bulan Mei taun tu, lalu deka dikerembai ngagai empat endur ke bukai.
Douglas ngamataka semaya ti digaga iya dalam bulan Disember rambau seminar DOPPA mantu gerempung nya enggau nyuaka geran RM50,000 dikena nyaup aktiviti sida rambau penemuai meri basa dalam bulan Mei.
Iya muji juluk enggau pen- gawa dikereja kaban gerempung mantu komuniti menua pesisir nyungkaka ekonomi sida, kelebih pekebun mit, ngubah tanah NCR sida nyadi kebun sawit dandang besai.
Ba lansa ke bukai, Incham ngansak bala kaban ke bisi ati deka nemu silik penerang ari DOPPA tau datai ngulu Aum Besai Ninting Taun (AGM) kena 5 Ogos di Bintulu.