Kriteria orang ti tau meli rumah PPR deka diserenih

Dikena nentuka semina orang ti penatai pemisi kurang ari RM3,000 bisi rumah kediri empu

MIRI: Kriteria orang ti ulih meli rumah Projek Program Perumahan Rakyat (PPR) deka diserenih kena nangkup peminta enggau penau sida ti nganjung peminta ngembuan rumah kediri empu.

Menteri Muda Pengawa Berumah enggau Pengerai Mensia Mayuh Dr Annuar Rapa’ee madah pengawa nyerenih pekara nya ngambika semina sida ti patut bulih rumah PPR aja diberi rega berengkah ari RM50,000.

“Rega rumah PPR ti diberi nya ungkup sida ti ngembuan penatai pemisi ruang bilik kasar baruh ari RM3,000 lalu aku dipadah bisi sekeda peminta enda nitihkaka kriteria laban bisi penatai pemisi lebih ari ke ditetap, lalu tu ngujungka peminta sida enda diterima.

“Bisi mega sida ke minta kreteria nya diperesa tauka diubah nitihka peminta ngambika semua ulih ngembuan rumah kediri empu, tang ke bendar sida ke penatai pemisi ruang bilik kasar ari baruh RM3,000 diberi pemerat,” ku iya.

Dr Annuar mansutka jaku tu rambau Pengawa Nyuaka Kunchi Projek PPR Lambir Miri bepalan di Balai Mayuh Guna PPR Lambir, Sungai Rait Miri ditu, kemari.

Sama bisi datai Ketuai Di- rektor Opis Pengawa Berumah Menua (JPN) Datuk Abdul Rahim Ishak, Kaban Kunsil Nengeri ( ADUN) Lambir Ripin Lamat, Chairman Perbadanan Pembangunan Perumahan ( HDC) Datuk Dr Abang Abdul Rauf Abang Zen, Sekretari Mendam Opis Menteri Kaunsil Kandang Menua enggau Pengawa Berumah Sarawak Bakrie Zaini, Ketuai Pemesai Eksekutif HDC Mohamad Asman Ahmad, sereta bala temuai dipebasa ke bukai.

Iya ke mega Menteri Muda Pelajar enggau Pemansik Teknologi mega ngarapka perintah besai deka ngagihka mayuh agi belanja dudi hari dikena ngaga ‘ rumah kos rendah’ di nengeri tu.

Nitih ku iya, kelimpah ari PPR nya, pengawa bejalaika Skim Perumahan Khas Rakyat (SPEKTRA) mega sekeda ari projek ke tuju nya dikena mantu rayat bisi rumah kediri empu.

“SPEKTRA ngarika kategori rumah mudah ari baruh kadar baru ti deka dipejalaika HDC.

“SPEKTRA tu bebida ari Rumah Mesra Rakyat (RMR) laban skim rumah enggau langkar baru ti deka dilanchar ari seiti menua ngagai menua ke bukai,” ku iya.

Kuiyanerang, pengawangaga 26 unit rumah SPEKTRA Permata ulih HDC iya nya di Skim Pembesaran Kampung Fasa 1 Kuching nyadi projek pemungkal di nengeri tu ke udah dilancharka Kepala Menteri bulan Febuari tu tadi.

Seraya sekeda kreteria iya nya pengempu lot ti diagihka Opis Tanah enggau Survey Sarawak enggau peranak Malaysia ke diau di Sarawak beumur 18 ngagai 65 taun, udah kawin, indai tunggal enggau apai tunggal ke nadai reta sereta penatai pemisi ruang bilik entara RM1,500 ngagai RM4,000 sebulan lalu nadai rekod ‘bankrap’ tauka dalam lis CTOS.

Ba lansa ke bukai, bisi 150 iku penerima bela nerima kunchi projek PPR Lambir Miri.

Berebak enggau nya, Dr Annuar mega nangkan sida ti udah bulih rumah nyaga iya enggau memanah.

“Kenang pemanah budi perintah ti udah ngasuh kita ngembuan rumah nya. Tentuka ukai semina kandang ngelingi rumah beresi, tang balai mayuh guna, surau enggau perengka guna ke bukai ti bisi disedia di PPR Lambir tu mega dijaga enggau manah.

“Pemeresi PPR Lambir nyadi tanggungpengawa kita semua. Taja jauh ari kandang mengeri Miri, tang iya meri pengelantang ngagai rayat ngembuan rumah kediri enggau rega ti ulih dibeli,” ku iya nambah.

Projek PPR Lambir Miri beungkus nyauka manggai RM90 juta digaga berengkah ari bulan April 2013 lalu mujur ditembu bulan November 2015 enggau 505 unit rumah teres seringkat.

Rega rumah PPR ti diberi nya ungkup sida ti ngembuan penatai pemisi ruang bilik kasar baruh ari RM3,000 lalu aku dipadah bisi sekeda peminta enda nitihkaka kriteria laban bisi penatai pemisi lebih ari ke ditetap, lalu tu ngujungka peminta sida enda diterima. Dr Annuar Rapa’ee Menteri Muda Pengawa Berumah enggau Pengerai Mensia Mayuh