SDNU Sibu deka ngatur Hari Diri Sebilik kena 12 Ogos
SIBU: Gerempung Dayak Sarawak (SDNU) Pampang Sibu sekali agi deka ngatur Hari Diri Sebilik kena 12 Ogos tu ba Taman Tasik Permai ditu.
Chairman SDNU Sibu Chambai Lindong madah, program tu deka belabuh ari pukul 7.30 pagi nyentuk 5 lemai.
“Pengerami tu ila disadang deka dipenyadi Sapit Menteri Pemansang Menua Pesisir enggau Kandang Menua Datuk Alexander Nanta Linggi.
“Kitai mega merambu lebih 700 bala raban gerempung enggau sida sebilik datai ngerichah pengerami tu,” pia ku iya madah ngagai pengarang berita, kemari.
Chambai madah, pengerami tu diatur sida dikena nyintalka agi kaul, besilih penemu bekaul enggau pemansang pengidup nyengkaum pekara pelajar anak sereta pelasar dikena raban SDNU Sibu bekala enggau pangan diri kelimpah nyediaka awak dikena bala mayuh ke bukai ngerejister nama diri nyadi raban gerempung tu.
Nambahka nya ku iya, maya nya mega sida deka nyuaka insentif pelajar ngagai bala anak raban gerempung ke udah bulih pemutus peresa ke manah ba UPSR, PT3, SPM enggau STPM ba taun 2016.
“Gerempung kami bela bisi nyuaka peransang ngagai raban enggau anak raban gerempung ke udah mujur bulih Diploma, Degree, Master enggau PhD ari bulan Oktober 2016 nyentuk 12 Ogos 2017.
“Berindik ari nya, sida ke bulih peransang tu dipinta nganjung salin pemutus tauka ‘transcript’ pemutus peresa, salin surat pengada enggau lumur telefon sida ngagai Pengajar Johnady Janton nengah lumur 013-802 3065 enda laun ari 8 Ogos tu,” ku iya madah baru.
Ba pengerami tu mega, mayuh macham program ke bukai deka diatur baka ‘senamrobik’, pekit nero enggau nyura ungkup nembiak mit, sukaneka, karaoke kelimpah program pemerindang ke bukai.
“Kitai nesau semua raban SDNU Sibu enggau sida sebilik datai sampal maya pengerami tu ila. Datai anang laun ari 7.30 pagi,” pia ku iya madah.
Sida ke deka datai ngulu pengerami nya dipinta meri nama enggau penyampau tubuh diri sebilik ti deka sama datai ngulu program tu ngagai Ketuai Unit SDNU Sibu ba endur diri empu tauka terus madah ngagai Sekretari SDNU Sibu Sammy Dennis (019-827 8103) tauka Sapit Sekretari SDNU Sibu Raphael Ampi (019-222 1250) enda laun ari 8 Ogos tu.