JPN mujur mutarka penanggul dokumen pengelala bansa Penan di Long Kevok

MARUDI: Kaban Parlimen (MP) Baram, Anyi Ngau ke ngabas komuniti Penan di Long Kevok bedau lama ke udah bela disempulang seraban Unit Mindah Kin Kitu ari Opis Pengerejista Bansa (JPN) sereta pemesai unit nya ari Bagi Menua Miri.

Nitih ku Anyi, pengawa tu dipejalai ngambika peranak genturung pendiau di kandang menua nya nganjung peminta surat pengada enggau tingki sida empu rambau penemuai ngagai Apoh iya nya sebengkah genturung pendiau komuniti Penan di Long Kevok.

“Batang tuju pejalai deka nentuka nembiak mit enggau orang besai tuai ari bansa Penan bisi surat pengada enggau tingki,” ku iya.

“Enti kitai ngandalka peranak Penan datai kediri empu, sekalika ke Marudi tauka JPN Long Lama nganjung peminta surat pengada tauka ngaga tingki, mar endar laban tebal agi bansa tu diau jauh di menua ulu, jauh ari mengeri tauka pasar Marudi,” ku iya seraya madahka menua nya dalam sitak P.220 Baram.

Rambau pejalai gawa nya, piak JPN enggau peme- sai nya bisi nyuaka surat pengada enggau tingki ti udah tembu digaga ngagai peranak di Kampung Long Kevok.

Penatai Anyi enggau sida sebuat disambut manah Ketuai Komuniti Long Kevok, Seman Ngang sereta kaban Komiti Pemansang enggau Pengelikun Genturung Pendiau (JKKK) iya.

Nitih ku Anyi, perintah ke diatu endang ngemeratka pejalai pengawa insentif ngambika peranak bansa Penan ke bedau bisi surat pengada enggau tingki, ngembuan iya.