KPM komited deka nyendiaka pelajar ke semua nembiak: Mahdzir
KUCHING: Opis Menteri Pelajar Malaysia ( KPM) komited deka nyendiaka pelajar ke semua nembiak menua tu.
Menteri Pelajar Malaysia, Dato Seri Mahdzir Khalid madahka pekara nya benung digaga di Malaysia beratika pelajar nyengkaum nembiak ke timpang pendiau ti patut diberi peluang ke sebaka enggau nembiak ke normal.
“Nimbal pasal pemar ke ditapi ba renggat global, pelajar ke nembiak timpang pendiau enda tau enda dikemerat, nyendiaka sida ngena pengelandik enggaupenemu, ngambika jemah ila, nguna pengelandik sereta penemu nya sida bulih pengelantang pendiau sebaka enggau orang bukai lalu sama bisi pemerat guna ba komuniti,” ku Mahdzir.
Iya madah munyi tu lebuh bejaku nutup ‘2nd International Conference on Special Education (ICSE 2017) ba Palan Konvensyen Borneo Kuching (BCCK) ditu, kemari.
Ku iya baru, Opis Menteri Pelajar (KPM) dalam Malaysian Education Blue Print 2013-2025’bisi bejuraika lima iti pekara ke Sistem Pelajar Malaysia, ke beratika pen- gulih akses, kualiti , ekuiti, penyerakup sereta pengasi.
“Pemerat tu patut disalin nyadi pengawa ke enda tau enda digaga nengah strategi, ti begunaka ubah ba tusun pengawa, polisi, sereta bejalaika ubah nya dalam sistem pelajar kitai.
“Aku pechaya, pelajar ke nembiak timpang pendiau enda tau enda dikemeratka lalu disukung ngena penemu, pengelandik, professionalisme ke pengajar ti ngajar ‘Special Education’ tu.
“Seseiku kitai enda nemu enti nembiak nya bisi tim- pang pendiau, laban kitai begunaka latih sereta penyiru ari mensia enti deka nemu nembiak nya bisi timpang pendiau. Kitai ukai semina ngelalau pengajar kitai, tang sida sebilik sereta komuniti, nimbal enggau manah, lalu ukai ngakim nembiak ke timpang pendiau.
ICSE 2017, konferen kedua ti diatur ulih ‘ SEAMEO Regional Centre for Special Education (SEAMEO SEN). ICSE keterubah suba kala diatur di Bangkok, Thailand dalam taun 2015, lalu ke taun tu, KPM enggau Perintah Nengeri Sarawak diberi basa ngatur konferen tu ke meri pemadah sereta bekunsi penemu nengah pansik sereta pengawa ke pemadu manah dalam pekara bekaul enggau ‘Special Education’.
Sebedau nya, Menteri Pelajar, Sains enggau Pansik Teknologi, Dato Sri Michael Manyin anak Jawong minta perintah besai nengah KPM meri ungkup ke mayuh agi ngagai sekula nembiak timpang pendiau.
Perintah Nengeri Sarawak nengah opis menteri nya ku iya, sigi nyukung belama sereta ngemeratka sekula nembiak timpang pendiau.
Ngajar nembiak ke timpang pendiau ukai pekara ke mudah, laban pengajar ke ngajar sida nya orang ke bepengelandik, bisi personaliti, pengerindu, liat ati sereta orang ke tegap. Kebuah aku madah tegap, laban ukai nyamai ngajar nembiak ke timpang pendiau ninting hari laban ulah sida ke nyelai ari nembiak ke normal. Nya alai, aku meri basa ngagai kita,” ku Manyin.
Nya kebuah aku minta ngagai KPM, ngambika nembiak ke timpang pendiau ulih dipasuk ngagai sekula normal baka nembiak bukai, ngambika sida iya enda ngasaika diri di seliah lalu ulih besemekih enggau nembiak bukai, ku iya.
Taja pia ku iya, di Sarawak pemesai menua tu aja mungkur urung 124,000 sq km, ngembuan pemayuh mensia urung 2.7 juta sereta puku rata ke se km persegi dalam 20 iku aja, lalu nambah enggau nya, infrastruktur di menua tu enda berapa manah.
Nya alai, lebuh nyendiaka infrastruktur ke nembiak timpang pendiau kelebih agi di menua pesisir, bisi pemerat ngempung nembiak ke timpang pendiau masuk sekula biasa ke bisi nyendiaka infrastruktur moden ke semua, ku iya seraya madahka kebuah minta KPM patut nambah belanja ke ungkup tu.
Sama bisi enggau ngulu atur pengawa nya kemari, Menteri Opis Kandang Menua enggau Pengawa Berumah, Prof Datuk Dr. Sim Hui Kian, Direktor Besai KPM Tan Sri Dr. Khaier Mohamad Yusof, enggau Sapit Direktor Sekretariat SEAMEO.