UNIMAS deka muka pampang di Kota Bharu Kelantan
KOTA SAMARAHAN: Pengawa nyain Sempekat Pemereti Ati (MoU) entara Universiti Malaysia Sarawak (UNIMAS) Holdings Sdn Bhd, Asiamet (M) Sdn Bhd enggau UNIMAS nyadi kelai setuju enggau penumbuh Palan Belajar UNIMAS Kota Bharu, kerejasama enggau Kolej Asia Metropolitan (pampang Kota Bharu, Kelantan).
Mandal Canselor UNIMAS Prof Dato Dr. Mohamad Kadim Suaidi madah, pengawa nyain sempekat pemereti ati (MoU) enggau Asiamet (M) Sdn Bhd dikena meri peransang ngagai raban UNIMAS , ba pengawa negapka pemansang UNIMAS Business School , setipak enggau pemerat global dalam pekara bekaul enggau pelajar.
“Nengah sempekat nya, UNIMAS deka seruran relevan ba pekara akademik global ke majak besemekih sereta napi pemar. Kerejasama enggau raban strategik setipak enggau ubah jeman diatu, lalu ke beguna endar dikena ngangkatka UNIMAS ba mata dunya, saraya ngemeratka komuniti ti begunaka penegap penemu,” ku Mohamad Kadim.
Iya madah munyi nya lebuh bejaku bejadika pengawa nyain MoU entara UNIMAS Holdings Sdn. Bhd., Asiamet (M) Sdn. Bhd. sereta Nyuaka Setipikit ‘Train the Trainer ProCEL Siri 1 & 2’ ba Staf Lounge, Rumah Universiti (UNIMAS) ditu, ensanus.
Sempekat nya digaga ngambika muka palan belajar di nengeri nya, ke bisi nyendiaka mayuh macham program akademik ba kampus besai UNIMAS baka ‘Sarjana Korporat Pentadbiran Pengajian Perniagaan, Sarjana Sains Pembangunan Sumber Manusia’ sereta kus bukai ke ulih digaga dalam timpuh pandak.
UNIMAS mega merambu deka nyendiaka program sarjana muda ba palan pelajar nya jemah ila.
“Tu setipak enggau pemerat universiti nyadi gudang penemu, alai proses ngulihka penemu diangkatka nengah kerejasama strategik enggau sekeda gerempung bukai, lalu ngaga bungkur kaul industri ke deka meri penguntung ngagai nembiak enggau komuniti,” ku iya.
Ku iya baru, kerejasama strategik ke baka tu ngeletakka universiti tu ba jalai ke mujur dikena negapka agi pejalai wang sereta mayar operasyen dalam UNIMAS.
“Bekaul enggau tu, UNIMAS merambu deka ngemansangka dagang kami lalu ngaga sekeda program komersial enggau kus ke ulih diambi dalam timpuh ke pandak jemah ila.
“Pengawa dagang ke dipunka UNIMAS Business School dikearapka ulih mantu ngulihka wang turu ke chukup, l ngarapka UNIMAS agi ulih numbuhka palan belajar di serata menua dalam Malaysia, ngambika tetiap iku rayat Malaysia bepeluang nampung pelajar sida ngagai renggat ke tinggi agi jemah ila,” ku iya.
Sebedau nya, Pemangku Dekan UNIMAS Business School, UNIMAS, Prof Madya Dr.Puah Chin Hong madahka penumbuh UNI- MAS Business School(UBS), siti singkang ke proaktif ti digaga UNIMAS.
“Tu laban UBS deka bejalaika pengawa ba pengawa negapka pelajar, penemu sereta pengelandik, nengah kus ke bisi disediaka ‘Pembelajaran sepanjang Hayat’ baik nya formal baka Program Sarjana Muda, Sarjana nengah kus kereja enggau ke enda formal baka kus timpuh pandak sereta kus kompetensi ngagai seseiku orang, komuniti, industri sereta professional ke bisi disediaka ProCEL (Professional Continuous Excellent Learning), iya nya siti unit ari baruh UBS,” ku Puah.
Asiamet ( M) Sdn Bhd sebuah kompeni ke dibuka dalam taun 1997, sebedau tu iya dikelala enggau nama Masterskill Training Sdn Bhd. Naka ke diatu, Asiamet (M) Sdn Bhd udah ngempu lima bpampang di serata Malaysia, ke alai dua ari pampang nya betikas universiti lalu tiga buah agi, kolej.
Dua pampang betikas universiti nya, Asia Metropolitan Universiti (di Cheras enggau Johor Bahru), tiga pampang betikas kolej, iya nya Kolej Asia Metropolitan Kota Bharu, Kolej Asia Metropolitan, Kuching enggau Kolej asia Metropolitan Kota Kinabalu.
Kolej Asia Metropolitan Kota Bharu sebedau tu dikelala enggau nama Kolej Global Masterskill Kota Bharu ke berengkah dibuka dalam taun 2007, udah mujur ngelatih urung 2,750 graduan.
Kena 17 April 2017 tu tadi, raban ari UNIMAS betuaika Mohamad Kadim ngelawa Kolej Asia Metropolitan Kota Bharu lalu setuju ngaga kerejasama nyendiaka program Sarjana muda enggau Sarjana nengah kus kereja.
UNIMAS mega bisi nyendiaka palan pelajar ba endur bukai baka di Sibu, Miri, Kota Kinabalu, Kuala Lumpur, Ipoh enggau Kota Bharu.
Ba atur pengawa nya, UNIMAS mega keterubah ngatur pengawa Nyuaka Setipikit ‘Train the Trainer ProCEL, Siri 1 enggau 2.
Program nya asil kerejasama entara UNIMAS Business School enggau JAF Prima Jaya Sdn Bhd enggau GEM Consultancy Sdn Bhd ke ngelatih urung 41 iku nembiak belabuh ari 3-7 April 2017 enggau 17-21 julai 2017 dalam program ‘Train the Trainer’ ke dibuka ngagai pengelicha ke meri licha,/ ngelatih/ fasilitator ke dikelala Pembangunan Sumber Manusia Sdn Bhd (PSMB).
Sama bisi ngulu atur pengawa nya ensanus, Sapit Mandal Canselor (Pekara Pelajar enggau Alumni) Prof Mohd Fadzil Abd Rahman, sapit Mandal Canselori ( Akademik enggau Entarabansa) Prof Dr. Wan Hashim Wan Ibrahim, Sapit Mandal Canselor (Pansik enggau Inovasi) Prof Dr Kopli Bujang, Chairman UNIMAS Holdings Sdn Bhd, Datu Jabidah Monseri, Direktor Eksekutif Asiamet (M) Sdn Bhd, Subramaniam a/l Amamalay engga Ketuai Pegawai Eksekutif Kolej Asia Metropolitan pampang Kota Bharu, Ahmad Nazir Abdullah.